Трампдан сўнгги огоҳлантириш: Эрон нефт тизими портлатмоқчи

АҚШ президенти Доналд Трамп «Fox News» телеканалига берган интервюсида Эроннинг нефт инфратузилмасига эҳтимолий зарба берилишига тахминан уч кун қолганини маълум қилди. Америка етакчисининг таъкидлашича, давом этаётган денгиз қамали ва хомашёни экспорт қилиш имконияти йўқлиги сабабли Эрон нефт тизими жисмоний вайрон бўлиш ёқасида турибди.

«Уч кундан кейин у шунчаки портлайди», — дея огоҳлантирди Трамп.

Унинг баҳолашича, айни дамда музокаралардаги барча устунлик ва «кўзирлар» АҚШ томонида.

Трамп музокаралар жараёни бўйича ҳам кескин баёнот берди. Энди АҚШ делегацияси Эрон билан мулоқот қилиш учун Покистонга бормайди. Агар Теҳрон музокараларни давом эттириш ниятида бўлса, унинг вакиллари АҚШга учиб келиши ёки шунчаки қўнғироқ қилиши кераклиги айтилди. Бу Вашингтоннинг Эронга нисбатан «максимал босим» сиёсати янги босқичга чиққанидан далолат беради.

Вашингтондаги суиқасд

Ушбу кескин баёнотлар Вашингтондаги «Washington Hilton» меҳмонхонасида содир бўлган отишма фонида янграмоқда. Эслатиб ўтамиз, Оқ уй мухбирлари ассоциациясининг кечки овқати вақтида калифорниялик 31 ёшли ўқитувчи Коул Аллен назорат-ўтказиш пунктига ҳужум қилган эди. Отишма натижасида Махфий хизматнинг бир ходими яраланган, бироқ президент ва унинг турмуш ўртоғи шошилинч эвакуация қилиниши натижасида соғ-омон қолган.

Дастлабки тергов маълумотларига кўра, қўлга олинган Коул Аллен ўз кўрсатмасида Оқ уй маъмурияти аъзоларига суиқасд қилишни режалаштирганини тан олган. Унинг сўзларига кўра, асосий нишон шахсан Трампнинг ўзи бўлмаган, балки маъмуриятнинг бошқа юқори мартабали вакиллари эди.

Шунга қарамай, Трамп бўлиб ўтган брифингда ўзини ҳужумчининг асосий нишони бўлган бўлиши мумкинлигини тахмин қилди. Ушбу ҳодиса АҚШ ичкарисида хавфсизлик чораларини кучайтириш билан бирга, ташқи сиёсатдаги кескинликни ҳам оширмоқда.