Трампнинг бойлиги 2024-йилги сайловдан кейин 2,7 млрд долларга ошди

АҚШ президенти Доналд Трампнинг бойлиги 2024-йилдаги президентлик сайловида ғалаба қозонганидан кейин 2,7 миллиард долларга ошиб, 7,3 миллиард долларга етди. Бу ҳақда «Forbes» ёзди.

«АҚШ тарихида ҳеч ким сиёсат орқали бунча кўп пул топмаган», — деб ёзади нашр.

Оқ уй раҳбарининг бойлиги ошишида асосий ролни криптовалюта лойиҳалари ва тезда пулга айлантириш мумкин бўлган активлар ўйнаган. Уларнинг умумий қиймати тахминан 2,4 миллиард долларни ташкил қилади.

Жумладан, Трамп 709 миллион долларлик мем-токенларга ва «World Liberty Financial» лойиҳасининг 338 миллион долларлик токенларига эга. Шунингдек, унинг стейблкоин чиқариш билан шуғулланувчи бизнеси 233 миллион долларга баҳоланган.

Бундан ташқари, АҚШ президенти мамлакатда ўнта голф майдонига, Mar-a-Lago клубига, Trump National Doral Miami голф-курортига ва Европадаги учта объектга эгалик қилади. «Forbes» ҳисоб-китобига кўра, уларнинг умумий қиймати 1,8 миллиард долларга етади.

Шунингдек, Трамп кўчмас мулкка 1,1 миллиард доллар сармоя киритган. Унинг энг йирик активлари қаторига Ню-Йорк ва Сан-Франциско шаҳридаги иккита офис мажмуасидаги улушлар, Trump Tower осмонўпар биноси, Trump Park Avenue тураржой мажмуаси ва бошқа объектлар киради.

Яна 1 миллиард доллар Трампнинг «Truth Social» ижтимоий тармоғига эгалик қилувчи «Trump Media and Technology Group» компаниясидаги улушига тўғри келади. «Forbes» таъкидлаганидек, молиявий нуқтаи назардан бу «Америкадаги энг мантиқсиз бизнеслардан бири». Компания 2024-йилда атиги 3,7 миллион доллар даромад олган, аммо 712 миллион доллар зарар кўрган.

Оқ уй раҳбарининг бошқа активлари тахминан 700 миллион долларга баҳоланади. Улар қаторига бошқарув бизнеси, вертолёт ва самолёт, фарзандларига берилган 5 миллион долларлик қарзлар ҳамда 2 миллион долларлик пенсия жамғармалари киради.

Шу билан бирга, «Forbes» ҳисоб-китобига кўра, Трампнинг бойлиги сўнгги бир йил ичида 300 миллион долларга камайган. Жумладан, у суд қарорлари бўйича 94 миллион доллар тўлаши керак.

Аввалроқ «Reuters» Трамп TRUMP мем-коинларини сотишдан 635 миллион доллар даромад олганини маълум қилган эди. Агентлик ҳисоб-китобига кўра, Трамп ҳокимиятга қайтганидан кейин унинг оиласи криптовалюта лойиҳаларига инвесторлардан камида 2,3 миллиард доллар жалб қилган.

«Reuters» суҳбатлашган этика бўйича мутахассисларнинг таъкидлашича, Трамп оиласининг криптовалюта соҳасидан олаётган даромадлари жиддий манфаатлар тўқнашувини келтириб чиқариши мумкин. Чунки бу соҳани бир вақтнинг ўзида Трамп маъмурияти ҳам тартибга солади ва қўллаб-қувватлайди.