Трампнинг ОАВ вакиллари билан кечки овқатланиши чоғида отишма юз берди

АҚШ президенти Доналд Трамп ва унинг маъмурияти аъзолари кеча, 25-апрел куни Оқ уй мухбирлари уюшмасининг анъанавий кечки тадбири бўлиб ўтаётган «Washington Hilton» меҳмонхонасидан «хавфсизлик таҳдиди» сабаб эвакуация қилинди, деб хабар бермоқда маҳаллий ОАВ. Оммавий ахборот воситаларига кўра, гап меҳмонхонада ўқ узган эркак ҳақида кетмоқда.

АҚШ махфий хизмати ва бошқа хавфсизлик идоралари Трамп нутқини кутаётган юзлаб одамлар жамланган банкет зали атрофини ўраб олган, деб ёзади «Associated Press». Айрим иштирокчиларнинг айтишича, улар тахминан бешдан саккизтагача ўқ овозини эшитган. Ўқ узган шахс залга кирмаган, воқеа меҳмонхонанинг бошқа қисмида содир бўлган.

Тадбирда Трампдан ташқари, биринчи хоним Мелания Трамп, АҚШ вице-президенти Ж.Д. Вэнс, мудофаа вазири Пит Ҳегсет ва давлат котиби Марко Рубио ҳам иштирок этган. Улар, шунингдек, тадбирга таклиф қилинган журналистлар ҳам эвакуация қилинган, меҳмонхонада хавфсизлик чоралари кучайтирилган.

Ҳодиса натижасида жабрланганлар ҳақида маълумот берилмаган.

Трамп: Ўқ узган шахс қўлга олинди

Кейинчалик Оқ уй пресс-пули АҚШ махфий хизмати гумон қилинган ўқчи қўлга олинганини маълум қилди. Бу маълумотни Доналд Трамп ҳам «Truth Social» ижтимоий тармоғидаги постида тасдиқлади.

«Вашингтонда жуда кескин кеча бўлди. Махсус хизматлар ва ҳуқуқни муҳофаза қилиш органлари ажойиб иш қилди. Улар тез ва жасур ҳаракат қилди. Ўқчи қўлга олинди. Мен «шоуни давом эттириш»ни тавсия қилдим, аммо тўлиқ равишда ҳуқуқни муҳофаза қилиш органлари тавсияларига амал қиламан», – деб ёзди АҚШ президенти.

Бироз вақт ўтгач, Трамп матбуот анжумани ўтказди. Унинг айтишича, ҳужумчида бир нечта қурол бўлган ва у одамларни ўлдириш ниятида бўлган. Шунингдек, у АҚШ махфий хизмати ходимларидан бирига ўқ текканини, аммо бронежилет уни ҳимоя қилганини билдирди.

Шуни таъкидлаш жоизки, «Washington Hilton» меҳмонхонаси тарихида бу биринчи суиқасд эмас — 1981-йилда айнан шу ерда президент Роналд Рейганга ҳужум уюштирилган эди. Трамп ушбу воқеа сабабли бекор қилинган тантанали кечки овқатни 30 кундан кейинга кўчиришни режалаштирмоқда. Коул Аллен 27 апрел куни федерал суд олдида жавоб беради. Унга қурол қўллаш ва зобитга ҳужум қилиш айблари қўйилган, бироқ тергов давомида айбловлар янада оғирлашиши мумкин.