Ukraina va Rossiya o‘rtasidagi «onglar jangi» yangi bosqichga ko‘tarildi — CNN
Improvizatsiya va texnologiyadagi yangiliklar zamonaviy urushni keskin o‘zgartirmoqda. Har ikki tomon oddiy samolyotlar, dronlar va eski snaryadlarni jangovar platformalarga aylantirmoqda.
CNN telekanali ma’lumotiga ko‘ra, Ukraina va Rossiya o‘rtasidagi to‘qnashuv endi faqat qurol miqdori bilan emas, balki texnologik yangiliklar va tez moslashish qobiliyati bilan belgilanmoqda. Zamonaviy urushda improvizatsiya va ilg‘or texnologiyalar hal qiluvchi ahamiyat kasb etmoqda.
Har ikki davlat ham turli texnik yechimlardan foydalanmoqda — yengil motorli samolyotlarga bombalar o‘rnatishdan tortib, 200 kmgacha masofada harakatlanuvchi boshqariluvchi aviabombalar va dengiz dronlarigacha. Ukraina maxsus operatsiyalar kuchlarining 14-polki yengil motorli samolyotdan avtomatik navigatsiya tizimi va oddiy bomba yordamida Dzerjinskdagi portlovchi moddalar zavodiga zarba bergani xabar qilingan.
Rossiya tomoni esa reaktiv dvigatelga ega boshqariluvchi aviabombalarni ishga sola boshlagan. Ularning uzoq masofaga uchish qobiliyati Ukraina havo hujumidan himoya tizimlari uchun yangi qiyinchilik tug‘dirmoqda.
Keng ko‘lamda sun’iy intellekt, robototexnika va dronlardan foydalanish urushning tabiatini o‘zgartirdi. Ukraina yaratgan dengiz dronlari dengizdagi kuchlar muvozanatiga jiddiy ta’sir ko‘rsatgan. Shu bilan birga, dronlarni tutib urish uchun pulemyot bilan jihozlangan yengil samolyotlar qo‘llanilayotgani — arzon va sodda vositalar ham samarali bo‘lishi mumkinligini ko‘rsatmoqda.
CNN tahlilchilari ta’kidlashicha, yuqori texnologiyali qurollarni ommaviy ishlab chiqarish uchun yillar kerak bo‘ladi, ammo tez improvizatsiya urush natijasini hozirning o‘zida belgilab berishi mumkin. Shu sababli bu urush endi doimiy texnik musobaqaga aylandi — arzon «frankenshteyn» dronlardan to murakkab raketa tizimlarigacha.
