Vazirlar Mahkamasi tomonidan 2025 yil 23 iyulda «Ayollar daftari», «Yoshlar daftari» va «Saxovat va ko‘mak» jamg‘armalari mablag‘lari hisobidan ijtimoiy yordam ko‘rsatish tizimini takomillashtirishga doir qaror
qabul qilindi. Ushbu hujjat bilan «Xotin-qizlar muammolarini o‘rganish va hal etish tizimini yanada takomillashtirish chora-tadbirlari to‘g‘risida»gi hukumat qaroriga o‘zgartirish va qo‘shimchalar kiritildi.
Kimlarga yordam beriladi?
Qarorga muvofiq, jamg‘armalarning moliyaviy yordami oylik daromadi har bir oila a’zosiga me’yoriy iste’mol xarajatlarining ikki barobaridan oshmaydiganlarga taqdim etiladi. Bu yordam ijtimoiy ehtiyojlarga qarab — fuqarolarga uy-joy sharoitini yaxshilash va sog‘lig‘ini saqlash yo‘nalishlarida ko‘rsatiladi.
Yordam viloyatlar va tumanlar kesimida aholining soni, nogironligi bo‘lgan fuqarolar va kam ta’minlangan oilalar ulushidan kelib chiqib taqsimlanadi.
Yana qanday imtiyozlar beriladi?
- Turar joy ijarasi uchun kompensatsiya to‘lash;
- Ijtimoiy loyihalarni moliyalashtirish uchun grant ajratish;
- To‘lov kontraktlarini to‘lash;
- Tibbiy amaliyot xarajatlarini qoplab berish;
- Bir martalik moddiy yordam ko‘rsatish;
- Yer uchastkalarini auksionda sotib olish xarajatlarini qoplab berish ko‘zda tutilgan.
Uy-joy ta’mirlash uchun yordam
Byudjet hisobidan ayollar uyini ta’mirlash uchun zarur bo‘lgan qurilish materiallarini yetkazib beruvchi tashkilotlarga «Ayollar daftari» jamg‘armasi orqali shartnoma asosida BHMning 50 baravarigacha — 20 mln 600 ming so‘m miqdorida mablag‘
ajratiladi. Bunda BHMning 1 avgustdan boshlab 412 ming so‘m etib belgilangani asos bo‘lib xizmat qiladi.
Tibbiy yordam olish uchun imtiyoz
Bu yordam kambag‘al oilalar ro‘yxatiga kiritilgan 30 yoshdan katta xotin-qizlar, oylik daromadi har bir oila a’zosiga me’yoriy iste’mol xarajatlarining ikki barobaridan oshmaydiganlarga taqdim etiladi.
Tibbiy yordam uchun 2 xil miqdor belgilangan:
- Jarrohlik amaliyotisiz davolanish. Bunda BHMning 50 baravarigacha yordam beriladi.
- Jarrohlik amaliyoti uchun yordam. Bunda Davlat tibbiy sug‘urta jamg‘armasi tomonidan qoplanishi belgilangan bazaviy narxlar belgilangan.
Ijtimoiy yordamni olish uchun ixtisoslashtirilgan muassasalarda tibbiy xizmat qiymati ko‘rsatilgan hamda QR kodga ega yo‘llanma talab qilinadi.
Turar joy ijarasi uchun kompensatsiya
«Ayollar daftari» jamg‘armasi mablag‘lari hisobidan turar joy ijarasi uchun to‘lovlarning 50 foizi, lekin ko‘pi bilan 500 ming so‘mgacha yordam beriladi. Toshkent, Nukus shahri va viloyatlar markazlarida BHMning 3 baravarigacha miqdorda qoplab beriladi.
Ijtimoiy loyihalarni moliyalashtirish uchun grantlar
Ayollar uchun maxsus grant dasturi e’lon qilinadi. Bu grant ayollarning ish topishi va jamiyatda faol bo‘lishiga yordam berish uchun mo‘ljallangan. Grant miqdori bazaviy hisoblash miqdorining 60 baravarini tashkil etadi. 1-avgustdan boshlab ayollar uchun ijtimoiy loyiha grantining miqdori 24 mln 720 ming so‘m bo‘ladi.
Ayollar va ayollar bilan ishlaydigan tashkilotlar bu grantga ariza berishlari mumkin. Har oyda eng yaxshi loyihalar tanlanadi va g‘oliblar 8-mart kunida e’lon qilinadi. Bir kishi yiliga faqat bir marta grant olishi mumkin.
OTM to‘lov kontraktlarini qoplab berish
Bu imtiyoz kambag‘al oilalar ro‘yxatiga kiritilgan 30 yoshdan katta xotin-qizlar va ularning ikki yoki undan ortiq farzandlarining bir nafariga to‘lab beriladi.
Ya’ni to‘lov kontrakt miqdorining 50 foizigacha, biroq BHMning 50 baravaridan ko‘p bo‘lmagan miqdorda qoplanadi. (1 avgustdan boshlab 20 mln 600 ming so‘mga teng bo‘ladi)
Bir martalik yordam
Boquvchisini yo‘qotgan, ijtimoiy yordamga muhtoj I va II guruh nogironligi bo‘lgan, tezkor tibbiy muolajaga muhtoj, qaramog‘ida nogironligi bo‘lgan farzandi mavjud ehtiyojmand xotin-qizlarga bir martalik ijtimoiy yordam ko‘rsatiladi. Bu BHMning 4 baravarigacha bo‘lishi nazarda tutilgan, ya’ni 1 avgustdan boshlab hisoblansa 1 mln 648 ming so‘m bo‘ladi.
Yer uchastkalarini sotib olish xarajatlarini qoplash
Kambag‘al oilalar reyestriga kiritilgan 30 yoshdan oshgan nogironligi bor xotin-qizlar uchun yer uchastkalarini sotib olish bilan bog‘liq xarajatlarga yordam beriladi. Agar autsion orqali sotib olish xarajatlari miqdori BHMning 100 baravarigacha bo‘lganda to‘liq, bundan yuqori bo‘lganda esa shu miqdorgachaga to‘lab beriladi. (1 avgustdan boshlab 41 mln 200 ming so‘m).
Mahliyo Hamidova tayyorladi.
