«Uzbekistan Airways» фойдаси 3 баробарга кўпайди
Компания мураккаб саноат муҳити фонида фойдасини сезиларли оширишга эришди. Унинг 25 фоизи UzNIF таркибида IPOга чиқарилади.
2026 йилнинг I чорагида «Uzbekistan Airways» соф фойдаси 151,8 млрд сўмни ташкил қилди. Бу ҳақда компания молиявий ҳисоботидан маълум бўлди.
Авиакомпания фойдаси 2025 йилнинг мос даврига нисбатан уч баровар кўпайди — ўшанда 49,6 млрд фойда олинганди.
Фойда сезиларли ўсишига даромадлар ошишидан кўра, харажатлар камайгани сабаб бўлди. Даромад 3,8 трлн сўмдан 3,9 трлн сўмга ўсган бўлса, харажатлар 3,7 трлн сўмдан 3,3 трлн сўмга қисқарди.
Бунинг натижасида «Uzbekistan Airways» ялпи фойдаси 171,2 млрддан 608,6 млрд сўмгача ўсди.
Уч ой ичида фойда солиғини тўлаш харажатлари 90,7 млрд сўмни ташкил қилди. 2025 йил I чоракда бу кўрсаткич 108,3 млрд сўм эди.
Таҳлилчининг фикрига кўра, буларнинг барчаси мураккаб саноат муҳити фонида содир бўлмоқда.
Эрон билан боғлиқ можаро туфайли авиация ёқилғиси нархлари тез суръатлар билан ўсиб бормоқда, бу эса компанияларни кескин чоралар кўришга мажбур қилмоқда.
Ўзбекистонда авиакомпаниялар ҳали бу муддатга ўтмаган, аммо улар, масалан, ёқилғи қўшимча тўловларини ошириш орқали мослашмоқдалар. Бироқ, агар Эрон билан боғлиқ можаро чўзилиб кетса, биз ҳам нархлар ва рейсларда сезиларли ўзгаришларни кўрамиз, — дейди таҳлилчи.
Хусусийлаштириш ва IPO
«Uzbekistan Airways»ни хусусийлаштириш 2022 йилда бошланган эди. Давактив ўша йил охиригача хусусийлаштириш бўйича аризаларни ҳам қабул қилган. Аммо бу жараён ҳалига амалга ошгани йўқ.
Хусусийлаштириш ўрнига компаниянинг 25 фоиз улуши Миллий инвестиция жамғармаси таркибида Лондон ва Тошкентда икки томонлама IPO орқали савдога чиқарилади.
IPO 2026 йил ўртасида ўтказилиши кутилмоқда. Жамғармага «Blackrock» ва «Franklin Resources» каби йирик инвесторлар қарийб 300 млн доллар маблағ киритишга тайёрлиги айтган.
