Vashington kelishuvi: O‘zbekiston va AQSH yangi Investitsiya platformasini ishga tushirmoqda
O‘zbekiston Prezidentining Vashingtonga tashrifi doirasida AQSHning yetakchi moliya institutlari bilan muhim hujjat almashildi.
Vashington shahriga tashrifning ishbilarmonlik tadbirlari davomida Prezident Shavkat Mirziyoyev AQSH Eksport-import banki prezidenti va raisi Jon Yovanovich hamda Xalqaro moliyaviy taraqqiyot korporatsiyasi (DFC) bosh ijrochi direktori Ben Blekni qabul qildi.
O‘tgan yili Prezident Donald Tramp bilan bo‘lib o‘tgan muzokaralar AQSH ishbilarmon doiralari bilan savdo-investitsiyaviy hamkorlikni kengaytirishga kuchli turtki bergani ta’kidlandi.
Ishbilarmonlik kengashi faoliyatini qo‘llab-quvvatlash va ustuvor loyihalarni tizimli ilgari surish uchun Investitsiya platformasini ishga tushirishga alohida e’tibor qaratildi.
Eksimbank bilan hamkorlik yo‘nalishlari belgilab olindi. Yirik sanoat va infratuzilmaviy loyihalarni moliyalashtirishni kengaytirish hamda yuqori texnologiyali uskunalar yetkazib berishni qo‘llab-quvvatlash shular jumlasidan.
DFC rahbariyati bilan suhbatda investitsiyaviy hamkorlik mexanizmlarini mustahkamlash muhimligi ta’kidlandi. Korporatsiyaning yirik milliy va mintaqaviy loyihalarda ishtirok etish, moliya bozori va energetika tarmog‘ini rivojlantirish bo‘yicha rejalari qo‘llab-quvvatlandi.
O‘zbekiston Prezidenti AQSH tomonini Toshkent xalqaro investitsiya forumida ishtirok etishga taklif qildi.
Uchrashuv yakunida O‘zbekiston Prezidenti huzurida tashrif davomida imzolangan O‘zbekiston va AQSH o‘rtasida investitsiya platformasini tashkil etish to‘g‘risidagi bitim almashildi.
