Aholiga ajratilgan gaz ballonlarini qimmat narxda sotmoqchi bo‘lgan 39 nafar mutasaddi aniqlandi
Xususan, birgina Zomin tumangaz sobiq mansabdorining qarindoshi xonadonidan 152 ta noqonuniy gaz balloni topilgan.
© hududgazO‘zbekistonda 19−21-oktabr kunlari o‘tkazilgan reydlarda suyultirilgan gaz ballonlarining noqonuniy aylanmasi bilan bog‘liq 120 dan ortiq holat aniqlandi. Reydlar DXX, Ichki ishlar vazirligi, Bosh prokuratura, FVV va O‘zenergoinspeksiya tomonidan hamkorlikda o‘tkazilmoqda.
Aniqlanishicha, jami aholi uchun gazlashtirilmagan hududlarga ajratilgan 13,6 tonna suyultirilgan gaz solingan 3000 dan ortiq ballon musodara qilingan. 39 ta holatda gaz xizmati xodimlarining aloqador ekani aniqlangan.
Xususan, Jizzax viloyatida 9 ta holatda 239 ta ballon noqonuniy saqlangan. Ulardan birida tuman gaz ta’minoti bo‘limida yuqori lavozimda ishlagan erkak qarindoshining uyida 152 ta ballonni saqlashda gumonlanmoqda.
Sirdaryo viloyatida Xovos tumani gaz ta’minoti bo‘limi mansabdor shaxsining uyidan 30 ta ballon olib qo‘yilgan.
Samarqand viloyatida Urgut tumani gaz ta’minoti bo‘limiga qarashli ballon to‘ldirish shoxobchasi qorovuli 3 ta to‘ldirilgan ballonni 2,5 million so‘mga sotayotganda ushlangan. Pastdarg‘om tumanida yashovchining uyidan esa 22 ta to‘ldirilgan ballon topilgan. Qayd etilishicha, u ularni tuman gaz ta’minoti bo‘limi haydovchisidan 70 ming so‘mdan sotib olib, 100 ming so‘mdan qayta sotgan.
Farg‘ona viloyatida Qo‘shtepa tumani gaz ta’minoti bo‘limi muhandisi va chilangar keyinchalik sotish uchun uylarida 8 ta ballonni noqonuniy saqlagan.
Surxondaryo viloyatidagi reydlar davomida 65 ta ballon olib qo‘yilgan. Holatlardan birida Bandixon tumanida yashovchi 39 yoshli erkak qayta sotish maqsadida tuman gaz ta’minoti bo‘limi haydovchisidan 32 ta ballonni 70 ming so‘mdan sotib olgan.
Navoiy viloyatida Xatirchi tumani gaz ta’minoti bo‘limi haydovchisining uyidan 26 ta ballon topilgan.
DXXga ko‘ra, shunga o‘xshash qoidabuzarliklar Qoraqalpog‘iston, Xorazm, Namangan va boshqa hududlarda ham aniqlangan.
Gaz ballonlarining noqonuniy aylanmasiga duch kelgan aholi 1520 raqamiga murojaat qilishga chaqirildi. Maxfiylik kafolatlanadi.
