O‘zbekistondagi ilk AESning birinchi energoblok poydevorini quyish yil oxirigacha yakunlanadi
Yil yakuniga qadar energoblok poydevoriga 10 ming kub metr beton quyiladi va 30 ming kishilik shaharcha barpo etiladi.
O‘zbekiston Respublikasi Prezidenti Shavkat Mirziyoyev va «Rosatom» davlat korporatsiyasi bosh direktori Aleksey Lixachyov 23-oktabr kuni Toshkentda bo‘lib o‘tgan uchrashuvda Jizzax viloyatida qurilayotgan birinchi atom elektr stansiyasi (AES) bo‘yicha amalga oshirilayotgan ishlarni muhokama qildi. Unga ko‘ra, 2026 yil oxirigacha birinchi energoblok reaktor bo‘limining poydevor plitasini qurib bitkazish rejalashtirilgan. Bu haqda O‘zbekiston Prezidenti matbuot xizmati va «Rosatom» korporatsiyasi ma’lum qildi.
O‘n ming kub metr beton va qurilish jarayoni
«Rosatom» matbuot xizmati xabariga ko‘ra, birinchi energoblok poydevorini tiklash uchun qariyb 10 ming kub metr beton yotqizish talab etiladi va bu jarayon joriy yil yakuniga qadar nihoyasiga yetadi. Aleksey Lixachyov 22-oktabr kuni Jizzax viloyatidagi qurilish maydoniga shaxsan tashrif buyurib, ishlarning borishi bilan tanishgan. Uchrashuvda davlat rahbariga qurilishning joriy holati, stansiyani loyihalashtirish va yaqin kelajakdagi ishlab chiqarish vazifalari bo‘yicha batafsil hisobot taqdim etilgan.
30 ming kishilik «atomchilar shaharchasi» va kadrlar tayyorlash
Muzokaralarda bo‘lajak AES yaqinida 30 mingdan ortiq mutaxassis va ularning oila a’zolari uchun mo‘ljallangan «atomgrad» (atomchilar shaharchasi)ni barpo etish masalasiga alohida e’tibor qaratilgan. Prezident matbuot xizmati qayd etishicha, ushbu shaharchada energiya tejamkor uy-joylar, zamonaviy ta’lim, tibbiyot va sport muassasalari barpo etiladi.
Shuningdek, soha uchun malakali kadrlar tayyorlash maqsadida «MMFI» milliy tadqiqot yadro universitetining Toshkentdagi filiali hamda «Rosatom» obyektlaridagi imkoniyatlardan foydalanish ishlari izchil davom ettirilayotgani ma’lum qilindi.
Hududning iqtisodiy va sanoat salohiyatini rivojlantirish maqsadida AES qurilish maydonchasidan 25 kilometr uzoqlikda yangi sanoat klasterini yaratish ko‘zda tutilgan. Bundan tashqari, tomonlar yadroviy tibbiyot va additiv texnologiyalar sohalaridagi hamkorlikni kengaytirish istiqbollarini ko‘rib chiqdi.
Aleksey Lixachyov «Rosatom» korporatsiyasi hamkorlikni yanada kengaytirish va O‘zbekistondagi strategik loyihalar bo‘yicha qabul qilingan majburiyatlarni to‘liq bajarishga tayyorligini aytdi.
