Vladimir Putin hokimiyatga 24 qarindoshini joylashtirgani fosh etildi

«Proyekt» jurnalistik tahliliy markazi olib borgan surishtiruvga ko‘ra, Rossiya prezidenti Vladimir Putin hokimiyat tizimida shaxsiy kumovchilik va qarindosh-urug‘chilikni eng yuqori darajaga olib chiqqan. Xabarda aytilishicha, u 24 nafar qarindoshini davlat lavozimlariga joylashtirgan — bu Rossiyaning so‘nggi 100 yildagi eng yuqori ko‘rsatkichi.

Surishtiruv «Otalar va bobolar» deb nomlanib, Telegram’dagi «Agentstvo» kanali tomonidan 6 noyabr kuni e’lon qilindi. Unda aytilishicha, Putinning rasman va norasman tan olingan turmush o‘rtoqlari — Lyudmila Ocheretnaya, Alina Kabayeva, Svetlana Krivonogix va Alisa Pishchevaya — ham davlat mablag‘lari bilan bog‘liq sohalarda ishlaydi yoki pul oladi. Masalan, Ocheretnaya hech qayerda ishlamasa-da, har yili yuz millionlab rubl daromad oladi.

Putinning ikki qizi — Mariya Voronsova va Yekaterina Tixonova — ham davlat mablag‘lari bilan bog‘liq loyihalarda ishtirok etmoqda. Ularga yaqin bo‘lgan turmush o‘rtoqlari — amaldagilar va sobiqlari ham lavozimlar va byudjetdan foydalanish imkoniyatiga ega bo‘lgan.

Qarindoshlar soni uchinchi avlodgacha yetib borgan. Bular orasida otasi tomonidan amakivachchalari — Igor va marhum Yevgeniy Putin, onasi tomonidan xolasi Lyubov Shelomova va yana bir qarindoshi Lyubov Kruglova bor. Shuningdek, Anna Sivilyova, Sergey Sivilyov, Mixail Putin va boshqa Putinlar — hozirda davlat kompaniyalari yoki hukumat tizimida katta vazifalarda ishlaydi.

Vafot etgan Yevgeniy Putinning nabiralari — Denis Putin, Dmitriy Loginov va Yelena Jidkova ham katta davlat vazifalarida bo‘lib, byudjet mablag‘lariga keng yo‘l ochilgan.

Putinning moddiy manbalari sifatida ko‘riladigan boshqa qarindoshlari — Mixail Shelomov, Roman Putin va boshqalar — «Rusgidro», «Gazprom», «Sibur», «Promsvyazbank» va RJD kabi yirik kompaniyalarda ishlaydi. Ular ayni vaqtda sanksiya ostidagi tuzilmalarda faoliyat yuritib, shaxsiy boyliklarni yig‘moqda.