«Халқ банки» реклама ва креатив хизматлар учун 15 млрд сўмдан ошиқ тендер ўтказмоқда

«Халқ банки» реклама ва коммуникация хизматларини харид қилиш бўйича 3 та тендер ўтказмоқда. Тендерларнинг умумий бошланғич қиймати 15 млрд 146,4 млн сўмни ташкил қилади.

Харажатлар қуйидагича тақсимланган:

• телеканалларда реклама жойлаштириш — 9 млрд 995,7 млн сўм;

• креатив коммуникация платформаси ва видеороликлар ишлаб чиқиш — 4 млрд 225,7 млн сўм;

• Тошкентдаги LED экранларга реклама жойлаштириш — 925,1 млн сўм.

Барча харидлар «Халқ банки»нинг ўз маблағлари ҳисобидан молиялаштирилади. Кўрсатилган суммалар тендерларнинг бошланғич нархи ҳисобланади. Шу сабабли савдолар якунида шартномалар қиймати пастроқ бўлиши мумкин.

Қарийб 10 млрд сўм ТВ рекламага сарфланади

Энг йирик тендер «Халқ банки» ва Хазна маҳсулотларини телеканалларда тарғиб қилишга мўлжалланган. Унинг бошланғич нархи ҚҚС билан 9 млрд 995,7 млн сўмни ташкил этади.

Ғолиб компания реклама кампанияси учун медиа-режа ишлаб чиқиши, рақобатчиларнинг ТВ рекламаларини таҳлил қилиши, роликларни жойлаштириши ҳамда натижалар бўйича ҳафталик ҳисобот тақдим этиши керак.

Рекламалар 5 ой давомида Zo‘r TV, Sevimli, MY5, Miliiy, FTV, Mix Union, Lux TV, Navo, O‘zbekiston ва Toshkent телеканалларида намойиш этилади.

Кампания бўйича жами 5 992 eqGRP тўплаш режалаштирилган. Бу рекламанинг мақсадли аудиторияга умумий таъсирини ифодаловчи кўрсаткич ҳисобланади.

Шундан:

• ипотека кредитлари рекламасига — 2 100 eqGRP;

• онлайн кредитларга — 2 100 eqGRP;

• банк карталарига — 896 eqGRP;

• бизнес учун маҳсулотларга — 896 eqGRP ажратилган.

Реклама жойлаштиришнинг ўртача 42,8 фоизи прайм-тайм вақтига тўғри келиши керак.

Тендер иштирокчиси Ўзбекистон Миллий медиа кенгаши аъзоси бўлиши, штатида камида беш нафар мутахассис ишлаши ва сўнгги уч йилда қиймати камида 1 млрд сўм бўлган ўхшаш лойиҳани амалга оширган бўлиши талаб этилади.

Бироқ техник топшириқда йиллик ТВ стратегияси ва йиллик медиа-режа ишлаб чиқиш вазифаси белгиланган бўлса-да, хизмат кўрсатиш муддати беш ой қилиб кўрсатилган. Ҳужжатларда йиллик стратегия ва беш ойлик реклама кампанияси қандай ажратилиши батафсил тушунтирилмаган.

LED экранларда реклама бир миллион мартадан ортиқ кўрсатилади

Иккинчи тендер Тошкентдаги 18 та LED экранга банк рекламасини жойлаштиришни назарда тутади. Хариднинг бошланғич қиймати 925 млн 55 минг сўм.

Экранлар Пирамит, Grand Mir меҳмонхонаси, Истиқлол саройи, Новза, Mega Planet, NEXT, Олой бозори ва пойтахтнинг бошқа гавжум нуқталарида жойлашган.

Ҳар бир реклама беш сония давом этади. Экранларга қараб реклама бир ойда 4 500 мартадан 9 000 мартагача намойиш қилиниши керак.

Техник топшириқдаги кўрсатиш сони ва муддатларни ҳисоблаганда, банк рекламаси жами 1 млн 8 минг марта намойиш этилиши режалаштирилган.

Бироқ ҳужжатнинг умумий қисмида хизмат муддати 12 ой деб кўрсатилган. Иловадаги жадвалда эса дастлабки саккизта экран учун уч ой, қолган ўнта экран учун 12 ой белгиланган.

4,2 млрд сўмга 36 та видеоролик

Учинчи тендер доирасида «Халқ банки»нинг ягона креатив коммуникация платформаси ишлаб чиқилади. Банк бу орқали ўз брендини янгилаш, мижозлар базасини кенгайтириш ва иш берувчи сифатидаги жозибадорлигини оширишни режалаштирган.

Тендернинг бошланғич нархи ҚҚС билан 4 млрд 225,7 млн сўм. Хизматлар 365 календарь куни давомида кўрсатилади. Ғолиб компанияга дастлаб шартнома қийматининг 15 фоизи ёки 633,9 млн сўм аванс сифатида тўланади.

Техник топшириқдаги жадвалга кўра, жами 36 та видеоролик тайёрланиши керак:

• иккита бир дақиқалик имиж ролиги;

• иккита бир дақиқалик HR видеоси;

• иккита бир дақиқалик ижтимоий ролик;

• 20 та йигирма сониялик реклама ролиги, уларнинг 10 ва 15 сониялик версиялари;

• ҳужжатда давомийлиги беш дақиқа деб кўрсатилган яна 10 та реклама ролиги.

Ҳар бир режалаштирилган видео учун камида учта сценарий варианти тақдим этилиши керак. Роликлар ўзбек тилида тайёрланиб, рус тилига мослаштирилади.

Актёрларга ҳам алоҳида талаблар қўйилган. Улар сўнгги 6 ойда «Халқ банки»га рақобатчи банклар рекламасида суратга тушмаган бўлиши керак.

Шунингдек, актёрларнинг ижтимоий тармоқларида банк обрўсига салбий таъсир қилиши мумкин бўлган провокацион, агрессив, сохта, фирибгарликка оид ёки сиёсий контент бўлмаслиги талаб этилади.

Ҳар бир видеороликда камида битта хизмат кўрсатган актёр ёки актриса ёхуд «Халқ артисти» унвонига эга ижодкор қатнашиши ҳам шарт қилиб қўйилган.

Тендерда камида беш йиллик тажрибага эга реклама агентликларига устунлик берилади. Иштирокчининг штатида камида 10 нафар мутахассис бўлиши керак. Маҳаллий ва халқаро реклама фестивалларида мукофот олган компанияларга қўшимча балл берилади.

Ҳужжатларда видеолар сони бир-бирига мос келмайди

Техник топшириқ жадвалида жами 36 та ролик ишлаб чиқилиши кўрсатилган. Бироқ ҳужжатнинг бошқа қисмида бир йил давомида ҳар ой камида тўртта видеоролик олиниши белгиланган. Бу талаб бўйича умумий видеолар сони камида 48 та бўлиши керак.

Роликлар формати бўйича талабда ҳам техник номувофиқлик бор. Ҳужжатда видеолар «4K (1920×1080) ва вертикал 9:16» форматда тайёрланиши қайд этилган. Аммо 1920×1080 ўлчами 4K эмас, Full HD ҳисобланади ва горизонтал 16:9 нисбатига мос келади. Вертикал 9:16 формат учун эса ўлчамлар тескари жойлашиши керак.

Шундай қилиб, «Халқ банки»нинг учта тендери видеороликларни ишлаб чиқишдан тортиб, уларни телеканаллар ва ташқи экранларда намойиш этишгача бўлган тўлиқ реклама кампаниясини қамраб олади.

Уччала тендер ҳам шу йилнинг 31-июль кунида якунланади.

«Халқ банки» 2030-йилгача хусусийлаштирилиши мумкин

Маълумот учун, «Халқ банки» Ўзбекистондаги энг йирик давлат банкларидан бири ҳисобланади. Банк ҳукумат учун муҳим ижтимоий вазифаларни бажаради. Жумладан, пенсия ва нафақа тўловларини аҳолига етказиб бериш каби хизматлар айнан шу банк орқали амалга оширилади.

2025-йилда «Халқ банки» Ўзбекистон Миллий инвестиция жамғармаси портфелида эди. Кейинчалик унинг ўрнини «SQB» эгаллади ва жамғарма IPOга чиқарилди.

Энди «Халқ банки»нинг ўзи ҳам хусусийлаштирилиши мумкин. Иқтисодиёт ва молия вазирлигининг 2027–2029-йилларга мўлжалланган Фискал стратегиясида банк хусусийлаштирилмайдиган давлат банклари қаторидан чиқарилган. Бу унинг 2030-йилгача сотилиши мумкинлигини англатади.