Хитой электромобиллардаги яширин эшик тутқичларини тақиқлади

Хитой электромобилларда яширин эшик тутқичларидан фойдаланишни тақиқлади ва шу билан ушбу баҳсли дизайнларни тўхтатган биринчи давлатга айланди. Бу дизайнлар Илон Маскка тегишли «Tesla» компанияси томонидан оммалаштирилган эди.

Бу қарор электр автомобиллари бутун дунёда хавфсизлик назорат органлари диққат марказида турган бир пайтда қабул қилинди. Хусусан, Хитойда «Xiaomi» электромобиллари иштирокида содир бўлган икки ҳалокатли авариядан сўнг, электр таъминоти узилиши сабаб эшикларни очиб бўлмагани гумон қилинган.

Давлат ОАВларига кўра, янги қоидаларга асосан автомобиллар фақат эшикларининг ичида ҳам, ташқарисида ҳам механик очиш мосламаси мавжуд бўлган тақдирдагина сотилишига рухсат этилади. Янги талаблар 2027 йил 1 январдан кучга киради.

Саноат ва ахборот технологиялари вазирлиги қоидаларига кўра, багажник эшигидан ташқари ҳар бир йўловчи эшигининг ташқи қисмида камида 6 см × 2 см × 2,5 см ўлчамда чуқурча бўлиши шарт – бу эшик тутқичига кириш имконини таъминлаш учун.

Автомобил ичида эса эшикни қандай очиш мумкинлигини кўрсатувчи камида 1 см × 0,7 см ўлчамдаги белгилар бўлиши лозим.

Аллақачон расмийлар томонидан тасдиқланган ва Хитой бозорига чиқишнинг сўнгги босқичида бўлган моделларга дизайнни янгилаш учун яна икки йил муҳлат берилади.

Яширин эшик тутқичлари Хитойнинг янги энергияли транспорт воситалари бозорида кенг қўлланилади. Бу тоифага электр автомобиллари, гибридлар ва ёқилғи элементларида ишловчи машиналар киради. Давлат назоратидаги «China Daily» газетаси келтирган маълумотларга кўра, энг кўп сотилаётган 100 та янги энергияли автомобил моделининг тахминан 60 фоизида яширин тутқичлар мавжуд.

Чора-тадбирлар фақат Хитой бозорида сотиладиган моделларга тааллуқли бўлса-да, мамлакатнинг жаҳон автомобил саноатидаги улкан ўрни туфайли бу қарор бутун дунёга таъсир кўрсатиши мумкин.

Айни пайтда «Tesla» эшик тутқичлари АҚШ хавфсизлик регуляторлари томонидан текширилмоқда, Европа давлатлари эса ўз қоидаларини жорий этиш имконини кўриб чиқмоқда.

Ноябр ойида АҚШ Миллий автомобиль йўл ҳаракати хавфсизлиги бошқармаси (NHTSA) «Tesla»нинг электр қувватида ишлайдиган эшик тутқичлари бўйича текширув бошлади. Бу қарор эшик тутқичлари кутилмаганда ишдан чиқиб, болалар автомобил ичида қамалиб қолгани ҳақидаги хабарлардан сўнг қабул қилинган.

«NHTSA» маълум қилишича, 2021 йилда ишлаб чиқарилган «Tesla Model Y» бўйича эшик тутқичлари ишламай қолгани ҳақида тўққизта шикоят келиб тушган. Ушбу ҳолатларнинг тўрттасида автомобил эгалари муаммони ҳал қилиш учун ойнани синдиришга мажбур бўлган.