«Xufiyona flot» tankerlari ommaviy ravishda yo‘nalishini o‘zgartirmoqda
AQSHning Venesuela atrofidagi dengiz bosimi natija bermoqda: sanksiyalarni chetlab o‘tayotgan tankerlar Amerika kuchlari bilan to‘qnashuvdan qochib, ommaviy ravishda ortga burilmoqda.
Pentagon Venesuela atrofida olib borilayotgan dengiz nazorati samara berayotganini ma’lum qildi. So‘nggi sutka ichida kamida yetti tanker Karib dengizida o‘z yo‘nalishini o‘zgartirib, harakatni to‘xtatgan yoki ortga qaytgan.
Bu haqda Pentagon matbuot kotibi Shon Parnell «X» ijtimoiy tarmog‘idagi sahifasida bayonot berdi. Uning so‘zlariga ko‘ra, AQSHning Venesuela neftini sanksiyalardan chetlab tashishda ishtirok etayotgan «xufiyona flot» tankerlariga qarshi qat’iy pozitsiyasi aniq natija bermoqda.
Parnell Vashington bunday kemalarning barchasini ushlab qolish yoki yo‘lini to‘sish niyatida ekanini ta’kidladi. Uning fikricha, tanker ekipajlari xavfni yaxshi anglamoqda va Amerika harbiy-dengiz kuchlari bilan to‘g‘ridan to‘g‘ri to‘qnashuvdan qochishni afzal ko‘rmoqda.
«Bizning yarimsharda qonunbuzarlik avj oladigan davr yakunlandi. Bu Prezident Donald Tramp va mudofaa rahbariyati olib borayotgan siyosat natijasidir», — deb yozgan Parnell.
So‘nggi kunlarda AQSH harbiylari Venesuela neftini tashiyotgan ikki tankerni ushlab qolgan. Xususan, yaqinda «Olina» nomli tanker to‘xtatildi. Kema Venesueladan chiqib ketib, ta’qibdan qochishga uringan, ammo Amerika kuchlari tomonidan qo‘lga olingan.
Bu harakatlar AQSHning Venesueladan neft yetkazib berish yo‘llarini qattiq nazorat qilish va sanksiyalarni aylanib o‘tish amaliyotini to‘liq to‘xtatishga qaratilgan keng qamrovli kampaniyasining bir qismi hisoblanadi.
Ma’lumotlarga ko‘ra, Venesuela neftini tashiyotgan ayrim tankerlar Rossiya bilan bog‘liq «xufiyona flot» tarkibiga kiradi, ayrim kemalar esa Rossiya bayrog‘i ostida harakat qilmoqda. AQSH tomoni bu faoliyatni xalqaro xavfsizlikka tahdid sifatida baholamoqda.
