Yangi biznes-ombudsman tayinlandi
Abdumannop Bo‘riyev prezident huzuridagi Tadbirkorlik sub’ektlari huquqlari va qonuniy manfaatlarini himoya qilish bo‘yicha vakili lavozimiga tayinlandi.
O‘zbekiston prezidenti huzuridagi Tadbirkorlik sub’ektlari huquqlari va qonuniy manfaatlarini himoya qilish bo‘yicha vakili (biznes-ombudsman) lavozimiga Abdumannop Abdurahmadovich Bo‘riyev tayinlandi.
Abdumannop Bo‘riyev 1986 yilda Toshkent viloyati Bekobod shahrida tug‘ilgan. U 2025 yilda Adliya vazirligi markaziy apparatida Tashkiliy-nazorat va strategik rejalashtirish boshqarmasi boshlig‘i lavozimiga tayinlangan, bunga qadar esa Tashkiliy-nazorat va tahlil boshqarmasiga rahbarlik qilgan.
Eslatib o‘tamiz, joriy yilning mart oyida 2017 yildan buyon biznes-ombudsman lavozimida ishlab kelayotgan Dilmurod Kasimov bosh prokuror o‘rinbosari etib tayinlangandi.
Biznes-ombudsmanning asosiy vazifalari:
— Tadbirkorlik faoliyatini rivojlantirish va ularning huquqlarini himoya qilish sohasida davlat siyosatini shakllantirishda ishtirok etish.
— Davlat organlari tomonidan tadbirkorlar huquqlariga rioya etilishini nazorat qilish.
— Tadbirkorlik sub’ektlari faoliyatida o‘tkaziladigan tekshirishlarning qonuniyligini monitoring qilish.
— Qonunchilikni takomillashtirish bo‘yicha takliflar tayyorlash.
Eslatib o‘tamiz, Biznes-ombudsman — tadbirkorlik sub’ektlarining huquqlari va qonuniy manfaatlarini himoya qilish bo‘yicha maxsus vakolatli mansabdor shaxs hisoblanadi. U prezident tomonidan lavozimga tayinlanishi va lavozimidan ozod etilishi belgilangan.
