Яқинда Ўзбекистонга келиб кетган ака-ука Тейтлар Америкада ҳибсга олинди
Улар зўрлаш, одам савдоси, тан жароҳати етказиш ҳамда порнография материалларини тарқатиш билан боғлиқ жиноятларда айбланмоқда.
© KollajАҚШ Адлия вазирлигига қарашли Маршал хизматлари 18-июль куни Майами шаҳрида интернет инфлюенсерлари ва бизнесменлар ака-ука Эндрю ва Тристан Тейтни қўлга олди. Бу ҳақда «The Washington Post» хабар берди.
Улар Буюк Британиянинг экстрадиция талаби асосида ҳибсга олинган. Британия Қироллик прокуратураси (CPS) ака-укаларни зўрлаш, одам савдоси, тан жароҳати етказиш ҳамда болаларга оид номақбул тасвирлар билан боғлиқ жиноятларда айбламоқда.
Прокуратура маълумотларига кўра, Эндрю ва Тристан Тейт 2010-йил июлдан 2017-йил августгача бир қатор жиноятларни содир этган. 39 ёшли Эндрю Тейтга қўшимча равишда 7 та зўрлаш, 3 та жинсий эксплуатация мақсадида одам савдосига ёрдам бериш, 3 та тан жароҳати етказиш ва порнография билан боғлиқ 19 та жиноят бўйича айбловлар қўйилган. 38 ёшли Тристан Тейтга нисбатан айбловлар сони камроқ бўлса-да, у ҳам зўрлаш ва одам савдосида айбланмоқда.
Улар ўзи ким?
Ака-ука Тейтлар АҚШ ва Буюк Британия фуқаролигига эга. Уларга нисбатан аввал ҳам Руминияда жиноят ишлари қўзғатилган эди. Тейтлар собиқ кикбоксчилар бўлиб, интернетда «эркаклик қадриятлари»ни фаол тарғиб қилиши орқали катта машҳурликка эришган. Эндрю Тейт ўзини аёлларга нисбатан салбий қарашлари бор инсон сифатида ҳам таърифлаган. У илгари ўзига қўйилган барча айбловларни рад этган. Янги айбловлар бўйича эса ака-укалар ҳозирча расмий муносабат билдирмаган.
Эндрю Тейт 2026-йилнинг апрель ойида укаси билан Ўзбекистонга келганди. Улар бир неча кун давомида Тошкент ва Самарқандда бўлиб, мухлислари билан кўришганди. Улар аэропортда, вокзалда тантанали равишда кутиб олингани акс этган видеолар тарқалганди, бу эса жамоатчилик эътирозларини келтириб чиқарганди. Ҳаттоки Эндрю Тейт видеоларидан бирида Самарқанддаги Амир Темур ҳайкали ёнида туриб, саркарда «ўз фаолиятини қароқчиликдан бошлагани» ҳақида гапирганди.
Эслатиб ўтамиз, аввалроқ 130 дан ортиқ мамлакатдан қарийб 20 минг меҳмон қатнашган Санкт-Петербург халқаро иқтисодий форумига шов-шувли блогерлар — Эндрю ва Тристан Тейтлар ҳам борганди.
