Yer 5 yil ichida yanada isib ketishi mumkin

Jahon Meteorologiya Tashkiloti ogohlantirishicha, 2025 yildan 2029 yilgacha bo‘lgan davrda Yer yuzasidagi o‘rtacha harorat 1850–1900 yillar orasidagi ko‘rsatkichlardan 1,2–1,9°C yuqori bo‘lishi kutilmoqda. Bu inson faoliyati tufayli sodir bo‘layotgan global isish jarayoni yanada tezlashganini anglatadi. Olimlar ta’kidlashicha, ushbu besh yillik davrda kamida bir yil tarixdagi eng issiq yil sifatida qayd etilishi mumkin. Bu holat hattoki 2024 yilda kuzatilgan yuqori harorat ko‘rsatkichlaridan ham oshib ketishi mumkinligini ko‘rsatmoqda. Eng xavotirli ko‘rsatkichlardan biri — haroratning 1,5°C dan oshib ketish ehtimoli 70 foizga yetganidir. Solishtirish uchun, bu ko‘rsatkich 2024 yilda 47% va 2023 yilda 32% edi. Bu degani, global isish tezligi yildan-yilga ortib bormoqda. Mutaxassislar harorat oshishi oqibatida butun dunyo bo‘ylab kuchli yomg‘irlar, qurg‘oqchilik, issiqlik to‘lqinlari va dengiz sathining ko‘tarilishiga o‘xshash halokatli tabiiy hodisalar tez-tez yuz berishi mumkinligini ta’kidlashmoqda. Iqlim o‘zgarishiga qarshi kurash va chiqindilarni kamaytirish bo‘yicha xalqaro hamkorlikni kuchaytirish talab etilayotgan bir paytda, ushbu ma’lumotlar ekologik xavf-xatarlar jiddiy tus olganini yana bir bor ko‘rsatmoqda.