«Евроучлик»дан кескин огоҳлантириш: Эронга қарши ҳарбий чоралар кўрилиши мумкин

Германия, Франция ва Буюк Британия етакчилари Эронга нисбатан қўшма баёнот билан чиқиб, Яқин Шарқдаги кескинлик туфайли ҳарбий чоралар кўришга тайёр эканликларини билдирди. ГФР ҳукумати матбуот хизмати томонидан тарқатилган ҳужжатда «Евроучлик» Теҳрондан «мулоҳазасиз ҳужумларни» зудлик билан тўхтатишни талаб қилган. Акс ҳолда, ушбу давлатлар ўз манфаатлари ва минтақавий иттифоқчиларини ҳимоя қилиш учун «зарурий чораларни» кўриши таъкидланган.

Баёнотда айтилишича, бу чоралар Эроннинг ракета ва дронларни учириш имкониятларини бевосита манбасида йўқ қилишга қаратилган мутаносиб ҳарбий ҳаракатларни ўз ичига олиши мумкин. Европа давлатлари Эроннинг Исроил ва АҚШ амалиётларига алоқаси бўлмаган объектларга берган зарбаларидан «ҳайратда» эканини билдирган. Ушбу қадамлар Вашингтон ва минтақа давлатлари билан яқин ҳамкорликда мувофиқлаштирилиши режалаштирилган.

Франция Президенти Эммануэл Макрон Абу Дабидаги француз ҳарбий-денгиз базасига қилинган ҳужумдан сўнг мудофаа кенгашининг фавқулодда йиғилишини ўтказди. У мамлакатнинг минтақадаги жанговар шайлигини ошириш ва иттифоқчиларга мудофаавий ёрдамни кучайтириш зарурлигини таъкидлади. Париж юз берган ҳодисаларни жавобсиз қолдирмаслигини қатъий билдирди.

Ҳарбий ва иқтисодий босим

Вазиятнинг кескинлашуви фонида Франциянинг «Шарл де Голл» авиаташувчи кемаси ва унинг зарбдор гуруҳи Эрон йўналишига сафарбар этилди. Ушбу кемалар илгари йирик қуролли тўқнашув сценарийларини имитация қилувчи «Орион» ўқув машғулотларида иштирок этаётган эди. Ҳарбий ҳаракатлар билан бир қаторда, Европа Иттифоқи Эронга нисбатан санкциялар режимини янада қатъийлаштириш имкониятини кўриб чиқмоқда.

ЕИ дипломатияси раҳбари Кая Каллас иттифоқ номидан чиқиш қилиб, хавфсизлик ва манфаатларни ҳимоя қилиш учун қўшимча чекловлар жорий этилишини истисно этмади. Брюссел Теҳронни ядровий дастур ва баллистик ракеталар лойиҳасини тўхтатишга яна бир бор чақирди. Шунингдек, Каллас Яқин Шарқда деэскалация зарурлигини таъкидлаб, кескинликнинг янада ортишидан хавотир билдирди.

Айни пайтда Эроннинг Исроил ва АҚШ ҳарбий объектларига ракета ҳужумлари давом этмоқда. Бу Вашингтон ва Тел Авивнинг Теҳрон ичидаги нишонларга берган интенсив зарбаларига жавоб сифатида баҳоланмоқда.

Дипломатик инқироз истиқболлари

Европа давлатларининг ҳарбий таҳдидлари Эрон билан муносабатлардаги кўп йиллик дипломатик йўлнинг инқирозига ишора қилмоқда. Илгари вазиятни музокаралар орқали юмшатишга интилган «Евроучлик» буёғига куч ишлатиш вариантини очиқ муҳокама қила бошлади. Бу эса Теҳроннинг халқаро майдондаги яккаланишини янада кучайтиради ва иқтисодий босимни оширади.

Франция ва Британиянинг минтақада муҳим ҳарбий базалари ва иқтисодий манфаатлари мавжуд. Ҳўрмуз бўғозидаги кескинлик ва тижорий кемаларга ҳужумлар Европа иқтисодиёти учун тўғридан тўғри таҳдид ҳисобланади.