Ёнғинлар товони бизнес елкасига тушиши мумкин: Сенат янги қонунни маъқуллади
2025 йил давомида Ўзбекистонда 11 241 та ёнғин содир бўлган. Оқибатда 82 киши ҳалок бўлган.
Олий Мажлис Сенати ёнғин хавфсизлиги тизимини такомиллаштиришга қаратилган қонунни маъқуллади.
Маълумотларга кўра, 2025 йил давомида Ўзбекистонда 11 241 та ёнғин содир бўлган. Оқибатда 82 киши ҳалок бўлган, фуқаролар ва тадбиркорлик субъектларига етказилган умумий зарар 249,2 миллиард сўмни ташкил этган.
Қайд этилишича, амалдаги қонунчилик ёнғин хавфсизлиги бўйича барча ҳуқуқий ва ташкилий механизмларни қамраб олмагани сабабли янги нормалар ишлаб чиқилган.
Савдо марказларига талаблар
Янги қонун билан бозорлар, савдо комплекслари ва савдо-кўнгилочар марказлари мулкдорларининг учинчи шахслар ҳаёти ва соғлиғига ёнғин натижасида етказилган зарар учун фуқаролик жавобгарлигини ҳамда ушбу объектларни ёнғиндан мажбурий суғурта қилиш тизими жорий этилмоқда.
Ҳужжатда, шунингдек, ёнғин хавфсизлигини таъминлашнинг асосий принциплари, бинолар ва иншоотларга қўйиладиган минимал техник талаблар, ёнғин аудитини ўтказиш тартиби ҳамда лойиҳа ташкилотлари, кўп квартирали уйларни бошқариш органлари ва бошқа масъул субъектларнинг ҳуқуқ ҳамда мажбуриятлари аниқ белгилаб берилмоқда.
