Zamonaviy urushlar oqibati: qochqinlar soni rekord darajaga yetdi — BMT
12.06.2025 | 21:2038813
BMTning yangi hisobotiga ko‘ra, 2025 yil aprel oyi oxirigacha butun dunyoda 122 milliondan ziyod kishi urush va zo‘ravonliklar tufayli o‘z uylarini tashlab ketgan. Sudan, Suriya va Afg‘onistondagi mojarolar eng katta migratsiya oqimlariga sabab bo‘lmoqda.
BMTning Qochqinlar ishlari bo‘yicha Oliy komissari boshqarmasi 2025 yil 12 iyun kuni e’lon qilgan «Global tendensiyalar» hisobotida qayd etilishicha, dunyo bo‘ylab majburiy ko‘chirilgan shaxslar soni 122,1 millionga yetgan. Bu ko‘rsatkich o‘tgan yil oxiriga nisbatan 1,1 millionga kamaygan. Kamayish asosan Suriyadagi vaziyatning ma’lum darajada barqarorlashgani bilan izohlanmoqda, deb yozmoqda Deutsche Welle.
Majburiy ko‘chirilganlarning katta qismi — taxminan 60 foizi o‘z mamlakatlari ichidagi nizolardan qochmoqda. Sudandagi urushlar tufayli 14,3 million kishi o‘z joyini tark etgan. Keyingi o‘rinlarda Suriya (13,5 mln), Afg‘oniston (10,3 mln) va Ukraina (8,8 mln) turibdi. Rossiyaning Ukrainaga qarshi urushi natijasida yuzaga kelgan ko‘chish oqimi hozirgi paytda to‘rtinchi o‘rinda hisoblanmoqda.
Chet elga qochganlarning katta qismi qo‘shni davlatlarda boshpana topmoqda. BMT ma’lumotlariga ko‘ra, barcha qochqinlarning 73 foizi o‘rta yoki past daromadli mamlakatlarda yashamoqda. Qolgan 23 foizi esa dunyoning eng kambag‘al mintaqalarida istiqomat qilmoqda.
BMTning Qochqinlar bo‘yicha rahbari Filippo Grandining aytishicha, «zamonaviy urushlar inson hayotiga chuqur ta’sir ko‘rsatmoqda, ammo moliyaviy ko‘mak hanuz 2015 yildagi darajada qolmoqda». Uning so‘zlariga ko‘ra, moliyaviy yetishmovchilik sharoitida ikki baravarga ortgan muhojirlar oqimi xalqaro yordam tizimini jiddiy sinov oldida qoldirmoqda.
Teglar:
SEO title:
Meta description:
