Зангиотада болаларга ноқонуний диний таълим берган шахсларга жиноят иши очилди
Улар 15 нафар вояга етмаган болани ноқонуний ҳужраларда ўқитиб келган. Маълумотларга кўра, айбланувчилар бир бола учун 300 долларгача пул олган ва уларга нисбатан жисмоний тазйиқ ўтказган.
Тошкент вилояти Зангиота туманида вояга етмаган болаларга ноқонуний диний таълим бериб келган шахслар аниқланди. Бу ҳақда Тошкент вилояти Ички ишлар бош бошқармаси маълум қилди.
Қайд этилишича, Зангиота туманининг Чинор маҳалласида яшовчи 44 ёшли шахс ва унинг 65 ёшли холаси икки хонадонда ноқонуний таълим бериш билан шуғулланган. Улар етарли диний билимга эга бўлмаган, шунингдек, тегишли рухсатномаларсиз фаолият юритган.
Маълумотларга кўра, биринчи хонадонда 10 нафар, иккинчисида эса 5 нафар вояга етмаган бола яшаш ва таълим олиш учун жойлаштирилган. Тергов жараёнида ҳар бир бола учун ойига 1 миллион сўмдан 300 долларгача маблағ ундирилгани аниқланган. Шунингдек, айрим ҳолатларда болаларга нисбатан жисмоний тазйиқ ўтказилгани тўғрисида далиллар мавжудлиги маълум қилинди. Бу ҳолат ҳуқуқни муҳофаза қилувчи органлар томонидан алоҳида назоратга олинган.
Болаларни тарбиялаш ва таълим бериш бўйича ўз мажбуриятларини лозим даражада бажармаган ота-оналарга нисбатан маъмурий чоралар кўрилган.
Ноқонуний диний таълим билан шуғулланган икки нафар шахсга нисбатан Ўзбекистон Республикаси Жиноят кодексининг 229(2)-моддаси, яъни диний таълимотдан сабоқ бериш тартибини бузиш моддаси билан жиноят иши қўзғатилди. Ҳозирда ушбу иш бўйича тергов ҳаракатлари олиб борилмоқда.
