Zelenskiy Rossiya nazoratidagi hududlardan voz kechishi mumkin

Bu taklifga ko‘ra, front chizig‘i hozirgi holatida qoldirilib, Lugansk, Donetsk, Zaporoje, Xerson oblastlari va Qrimning egallab olingan qismi ustidan nazorat Rossiyaga o‘tadi. Avvalroq Zelenskiy hududiy yo‘l qo‘yishni o‘z ichiga olgan har qanday kelishuvni rad etishga chaqirgan edi. Biroq u Rossiya allaqachon egallagan yerlarni qaytarib olish imkoniyati cheklanganini tan oldi. G‘arb rasmiylariga ko‘ra, bu masala 15 avgust kuni AQSH va Rossiya prezidentlarining Alyaskadagi uchrashuvi arafasida muhokama qilinishi mumkin. Yevropa davlatlari Zelenskiy ishtirokisiz Donald Tramp va Vladimir Putin o‘rtasida urushni to‘xtatish bo‘yicha kelishuvga erishilishi ehtimolidan xavotirda. Polsha bosh vaziri Donald Tusk «menda ko‘plab xavotirlar va umidlar bor» deb ta’kidladi. Muzokaralar oldidan AQSH rasmiylari Yevropa yetakchilari bilan maslahatlashishga va’da berdi. Yevropaning eng katta xavotiri — Moskva taklif qilgan, frontni Ukrainaning janubi-sharqida «muzlatish»ni ko‘zda tutgan tinchlik rejasi. Bu rejaga ko‘ra, Kiyev Donetsk va Luganskdagi o‘z nazoratidagi hududlardan ham chekinishga majbur bo‘ladi. Yevropa diplomatlari fikricha, Putin hali ham maqsadini o‘zgartirmagan — Ukrainada Yevropa tarafdori hukumatni ag‘darib, uning o‘rniga Moskvaga sodiq tuzum o‘rnatish niyatida. AQSHdagi Urushni o‘rganish instituti ma’lumotlariga ko‘ra, Rossiya hanuz Kiyevdan to‘liq taslim bo‘lishni, NATOga qo‘shilmaslikni va qurolsizlanishni talab qilmoqda. Zelenskiy esa Rossiyaning urushni haqiqiy tugatish niyatiga ishonmasligini bildirdi. Unga ko‘ra, Rossiya qo‘shinlarini yangi hujumlarga tayyorlamoqda. Ukraina, hatto hududiy yo‘l qo‘yishga rozi bo‘lsa ham, NATOga a’zo bo‘lish va qo‘llanmalar olish imkoniyatini saqlab qolish niyatida. Avvalroq, The Wall Street Journal nashriga tayanib Ukraina prezidenti Volodimir Zelenskiy Rossiyaning Ukraina hududlarini bo‘lish haqidagi istaklarini keskin rad etgani haqida xabar bergan edik.