Turkmaniston «Galkinish»da 10 mlrd kubometrli gazni qayta ishlash zavodini quradi

Turkmanistonda «Galkinish» gaz konini o‘zlashtirishning to‘rtinchi bosqichi doirasida yillik quvvati 10 mlrd kubometr bo‘lgan gazni qayta ishlash zavodi qurish rejalashtirilmoqda. Bu haqda «Turkmengaz» vakili Aman Xasiyetov ma’lum qildi.

Loyiha xitoylik hamkorlar bilan hamkorlikda amalga oshiriladi, u 30 ta ekspluatatsion quduq qazishni o‘z ichiga oladi, shuningdek, infratuzilma va ijtimoiy obyektlar qurilishini ham qamrab oladi. Umumiy investitsiya hajmi taxminan 5 mlrd dollarga baholanmoqda.

Xasiyetovga ko‘ra, loyihada jahonning yetakchi ishlab chiqaruvchilari texnologiyalari qo‘llaniladi, bu esa kelajakdagi ishlab chiqarish majmuasining yuqori texnologik darajasini ta’minlaydi. Qurilishni 2030-yilga qadar yakunlash va shundan so‘ng gaz yetkazib berishni boshlash rejalashtirilgan.

Gaz ta’minoti ichki bozor va tashqi bozorlar talabi asosida belgilanadi.

«Galkinish» – dunyodagi eng yirik gaz konlaridan biri

«Galkinish» gaz koni Turkmanistonning sharqida joylashgan va dunyodagi eng yirik gaz konlaridan biri hisoblanadi. Uning zaxiralari 4 trlndan 14 trln kubometrgacha baholanadi. Kon 2006-yilda kashf etilgan, 2013-yildan esa sanoat miqyosida gaz qazib olish «Turkmengaz» boshqaruvi ostida boshlangan.

«China National Petroleum Corporation» (CNPC) 2009-yilda shartnomalar orqali loyihaga kirib kelgan va asosiy xorijiy hamkorlardan biriga aylangan. Kompaniya gazni qayta ishlash quvvatlari, infratuzilma qurilishida faol ishtirok etgan va 2025-2026-yillardagi yangi bosqichni amalga oshirish uchun tanlangan.

2026-yil mart oyida «Turkmengaz» va CNPC o‘rtasida «pod klyuch» asosida loyihalash va qurilish bo‘yicha shartnoma imzolangan. Loyiha yiliga 10 mlrd kubometrgacha gaz ishlab chiqarish imkonini beradi va mamlakatning eksport salohiyatini oshiradi.

Yevropaga gaz yetkazib berish rejalari

Turkmaniston tashqi ishlar vaziri Rashid Meredov Antaliya diplomatik forumida so‘zga chiqib, mamlakat uchun ustuvor yo‘nalishlardan biri Yevropaga gaz yetkazib berish ekanini ta’kidlagan. Uning so‘zlariga ko‘ra, Kaspiy dengizi orqali Yevropaga gaz yetkazish bo‘yicha g‘oyalar ustida avval ham ish olib borilgan.

«Türkmen Dünýäsi» bosh muharriri Botir Murodovning ma’lum qilishicha, Turkmaniston tabiiy gazni Ozarbayjon orqali Yevropaga eksport qilish imkoniyatini ham ko‘rib chiqmoqda. Bu esa mamlakatning global energetika bozoridagi rolini yanada kuchaytirishga qaratilgan strategik qadam sifatida baholanmoqda.