Техногигантлар СИ пойгасини тезлаштирди: сармоялар 448 млрд долларга етди
Сунъий интеллект инфратузилмасига сармоялар кескин ўсмоқда – «Alphabet», «Amazon», «Microsoft» каби компаниялар сўнгги йилларда харажатларни уч бараварга яқин оширди.
© business-standard.comЖаҳоннинг энг йирик технологик корпорациялари сунъий интеллект (СИ) инфратузилмасига сармояларни жадал оширмоқда. 2022-йилдан буён уларнинг капитал харажатлари қарийб уч бараварга кўпайган. 2025-йилнинг сўнгги чораги якунларига кўра, бешта етакчи компаниянинг умумий инвестициялари уч ой ичида 140 млрд доллардан ошди. Бу ҳақда «Visual Capitalist» хабар берди.
Экспериментлардан кенг кўламли ривожланишга
«Epoch AI» таҳқиқотига кўра, бешта гиперскейлер – «Alphabet», «Amazon», «Meta», «Microsoft» ва «Oracle»нинг умумий капитал харажатлари 2022-йилдаги 162,3 млрд доллардан 2025-йил якунларига келиб 448,3 млрд долларга етган.
Бурилиш нуқтаси 2023-йил ўрталарига тўғри келади. Шундан бери СИга сармоялар босқичма-босқич ўсишдан кескин тезлашишга ўтди – ўртача йиллик ўсиш суръати 72 фоизни ташкил этмоқда.
(фото)
Энди компаниялар алоҳида экспериментал лойиҳалардан воз кечиб, кенг кўламли инфратузилма қурилишига ўтди. Жумладан:
— маълумотларни қайта ишлаш марказларини (data center) оммавий қуриш
— махсус СИ-чипларни катта ҳажмда харид қилиш
— булутли тармоқларни кенгайтириш
Фақат 2025-йилнинг тўртинчи чорагидаёқ ушбу беш компаниянинг умумий харажатлари 140,6 млрд долларни ташкил этган.\
Инвестиция пойгаси етакчилари
Энг катта молиявий ўсишни «Microsoft» намоён этди. 2022-йилнинг биринчи чорагидан 2025-йилнинг тўртинчи чорагигача у ўзининг чораклик капитал харажатларини 30 млрд долларга оширган.
Иккинчи ўринни «Amazon» эгаллаб, 25 млрд долларлик ўсишни қайд этди. Учинчи ўринда эса «Alphabet» («Google»нинг она компанияси) бўлиб, у 19 млрд доллар қўшимча сармоя киритган.
Шунингдек, «Meta» ва «Oracle» ҳам ўз чораклик харажатларини мос равишда 17 млрд ва 12 млрд долларга оширган.
(фото)
Харажатларни ҳисоблаш хусусиятлари
Таҳлилнинг максимал холислигини таъминлаш учун мутахассислар матбуот анжуманларида берилган баёнотларга эмас, балки расмий молиявий ҳисоботларга таянган. Жумладан, АҚШ Қимматли қоғозлар ва биржа комиссиясига тақдим этиладиган стандарт «10-Q» ва «10-K» шакллари асос қилиб олинган.Ушбу тадқиқотда «капитал харажатлар» деганда фақатгина асосий воситаларга (кўчмас мулк, заводлар ва ускуналар – PP&E) қилинган реал пул сарфлари, шунингдек, янги молиявий лизинг шартномалари тушунилади.
Бундай ёндашув таққослашни аниқроқ қилади, аммо тадқиқотчилар таъкидлашича, бу маблағларнинг барчаси ҳам фақат сунъий интеллект (СИ) лойиҳаларига йўналтирилмаган. Шу билан бирга, операцион лизинг шартномаларининг ҳисоб-китобга киритилмаслиги компанияларнинг ўз қувватларини кенгайтиришга қаратилган умумий инвестициялари ҳажмини бироз камайтириб кўрсатиши мумкин.
