Тим Кук «Apple» раҳбарлигидан кетмоқда: Технология гигантини энди ким бошқаради?
Қарийб 15 йил давомида «Apple» компаниясини узлуксиз бошқариб келган Тим Кук бош директор лавозимини тарк этишини эълон қилди. Унинг ўрнига аллақачон муносиб ворис тайинланди.
© Getty Images (Cook); Courtesy of Apple (Ternus)«Apple» компаниясининг амалдаги бош директори Тим Кук жорий йилнинг 1-сентябрида ўз лавозимини расман тарк этади. Унинг ўрнини ҳозирда аппарат инжиниринги (hardware engineering) бўлими раҳбари бўлиб ишлаётган Жон Тернус эгаллайди, деб ёзмоқда Sky News.
Тим Кук компаниядан бутунлай кетмайди. У ижрочи раис (executive chairman) лавозимида фаолиятини давом эттириб, дунё бўйлаб сиёсатчилар билан музокаралар олиб бориш ва компаниянинг муҳим йўналишларини қўллаб-қувватлаш билан шуғулланади.
«Ҳаётимдаги энг катта шараф»
1998-йилда Apple жамоасига қўшилган ва марҳум Стив Жобсдан сўнг раҳбарликни қўлга олган Тим Кук ўзининг ушбу қарори юзасидан фикр билдирди:
«Apple бош директори бўлиш ва шундай ғайриоддий компанияни бошқариш мен учун ҳаётимдаги энг катта шараф бўлди. Мен Apple’ни бутун борлиғим билан яхши кўраман ва шундай буюк жамоа билан ишлаганимдан чексиз миннатдорман», — деди у.
Шунингдек, Кук ўзининг вориси Жон Тернусни «инноватор қалбига эга бўлган ҳақиқий визионер» деб таърифлади ва компания келажагини айнан унга ишониб топшириш энг тўғри қарор эканини таъкидлади.
Жон Тернус ким?
Жон Тернус Apple компаниясида 2001 йилдан бери ишлаб келмоқда. Ўзининг 25 йиллик фаолияти давомида у компаниянинг энг инқилобий маҳсулотлари, жумладан барча авлоддаги iPhone ва Mac қурилмалари, iPad ва AirPods, Apple Watch ақлли соатларини ишлаб чиқаришда бевосита иштирок этган:
Жон Тернус Тим Кукни ўзининг устози деб атаб, бундай юксак ишонч ва Apple миссиясини давом эттириш имконияти учун чуқур миннатдорлик билдирди. У келажакдаги янги марралар ва ютуқларга катта умид билан қараётганини қўшимча қилди.
