14 ming dollarlik ta’mir: Elektromobildagi eng qimmat nosozlik nima ekanligi ma’lum bo‘ldi
Eski elektromobil xaridorlarini eng ko‘p tashvishga soladigan jihat – asosiy akkumulatorning ishdan chiqishi aslida juda kam uchraydigan holatdir. Yangi tadqiqot natijalariga ko‘ra, elektromobil egalari qimmatbaho batareya almashtirishdan ko‘ra boshqa muammoga ko‘proq duch kelishadi.
Eski elektromobil egalari qimmatbaho asosiy akkumulatorning buzilishidan ko‘ra, odatiy mexanik va elektr tizimlaridagi nosozliklarga ko‘proq duch kelishadi. Bu haqda Buyuk Britaniyaning «Warrantywise» kompaniyasi tomonidan o‘tkazilgan yangi tadqiqotda ma’lum qilindi.
Tadqiqot ma’lumotlariga ko‘ra, elektromobillarda eng ko‘p uchraydigan muammolar an’anaviy ichki yonuv dvigatelli avtomobillardagi kabidir. Elektr tizimidagi umumiy nosozliklar, osma (podveska) qismlarining yeyilishi va oddiy 12 voltli akkumulatordagi muammolar yuqori kuchlanishli asosiy batareyaga qaraganda ancha ko‘p qayd etilgan.
Eng ko‘p uchraydigan nosozliklar va ularning narxi
Ta’mirlash xarajatlari ro‘yxatida sensorlar va markaziy qulflash tizimlarini o‘z ichiga olgan umumiy elektr nosozliklari yetakchilik qilmoqda. Xususan, sensorlarni ta’mirlash o‘rtacha 1085 dollarni tashkil qilsa, ba’zi holatlarda bu ko‘rsatkich 4380 dollargacha yetgan. Markaziy qulflash mexanizmini tuzatish esa o‘rtacha 1205 dollarga, eng murakkab holatlarda 5435 dollarga tushgan.
Elektromobilning og‘ir vazni sababli osma tizimida ham tez-tez muammolar yuzaga kelib, uning o‘rtacha ta’mirlash xarajatlari 1650 dollarni (eng qimmati 5515 dollar) tashkil etgan. Eng ko‘p buziladigan beshta qism qatoriga kirgan 12 voltli yordamchi akkumulatorni almashtirish o‘rtacha 716 dollarga baholangan.
Top-5 talik ro‘yxatdan joy olgan yagona maxsus EV qismi bu — bort zaryadlovchi qurilmasi bo‘lib, uni ta’mirlash o‘rtacha 2890 dollarni, eng qimmat holatda esa 14 000 dollarni tashkil qilgan. Xaridorlarni eng ko‘p tashvishga soladigan asosiy yuqori kuchlanishli akkumulator esa eng ko‘p buziladigan beshta qism qatoriga kirmagan. Biroq, ushbu batareya ishdan chiqqan kamyob holatlarda ta’mirlash o‘rtacha 8570 dollarga tushgan.
Shuningdek, 2024 yildan 2025 yilgacha elektromobillarni ta’mirlash bo‘yicha o‘rtacha xarajatlar inflatsiya, ish haqi va ehtiyot qismlar narxi oshishi hisobiga 10,7 foizga qimmatlashgani qayd etildi.
