80 kishi halok bo‘ldi: Ebola tarqalishi sabab JSST xalqaro xavf haqida ogohlantirdi

Kongoda Ebola virusi sababli deb taxmin qilingan 80 kishi vafot etdi. Ebola infeksiyasining qo‘shni mamlakatga ham o‘tgani qayd etildi, deb xabar berdi Jahon sog‘liqni saqlash tashkiloti (JSST).
JSSTning so‘nggi ma’lumotlariga ko‘ra, Kongo demokratik respublikasidagi kasallik avj olishidan so‘ng aholi orasida jami 80 ta o‘lim holati qayd etilgan bo‘lib, ularning Ebola virusi bilan bog‘liq ekani taxmin qilinmoqda.

Laboratoriya tahlillari «Bundibugyo ebolavirus»ning mavjudligini tasdiqlagan. Tekshirilgan 13 namunadan 8 tasida virus aniqlangan. Namunalar Ituri viloyatidagi ikki sog‘liqni saqlash hududidagi bemorlardan olingan.

Jahon sog‘liqni saqlash tashkiloti mahalliy hokimiyatlarga yordam berish va epidemiyaga qarshi choralarni muvofiqlashtirish uchun mutaxassislar guruhini hududga yubordi. Tashkilotning ta’kidlashicha, kasallik aholi harakati yuqori bo‘lgan va «murakkab operativ vaziyat» kuzatilayotgan hududlarda tarqalmoqda. Bu esa infeksiyaning yanada kengayish xavfini oshirmoqda.

Qo‘shni Ugandada ham virus yuqtirish holati tasdiqlangan. Kongo demokratik respublikasidan kelgan bemor Ugandadagi tibbiyot muassasasida davolangan, ammo keyinchalik vafot etgan.

Favqulodda vaziyat, ammo pandemiya emas

Shu bilan birga, Jahon sog‘liqni saqlash tashkiloti «X» ijtimoiy tarmog‘ida Kongo va Ugandadagi «Bundibugyo ebolavirus» keltirib chiqargan Ebola epidemiyasi munosabati bilan xalqaro ahamiyatga ega favqulodda sog‘liqni saqlash holati e’lon qilinganini ma’lum qildi.

Tashkilot bayonotida shunday deyiladi:

«JSST bosh direktori ishtirokchi davlatlar bilan maslahatlashuvlardan so‘ng, Bundibudjio virusi keltirib chiqargan Ebola isitmasi Kongo demokratik respublikasi va Ugandada xalqaro xavf tug‘diruvchi jamoat salomatligi sohasidagi favqulodda vaziyat ekanini belgilaydi. Biroq u pandemiya darajasidagi favqulodda holat mezonlariga to‘liq javob bermaydi».