Аргентина 350 минг доллардан бошланадиган «олтин» паспортлар беришни режалаштирмоқда
Мамлакат 2026-йил охиригача инвестиция эвазига фуқаролик бериш дастурини ишга туширмоқчи. Ариза берувчиларнинг оила аъзолари ҳам қўшимча тўлов эвазига Аргентина фуқаролигини олишлари мумкин.
© ReutersАргентина Жанубий Америкада биринчи бўлиб инвестиция эвазига фуқаролик бериш дастурини ишга туширади. Бу ҳақда мамлакат иқтисодиёт вазири Луис Капуто маълум қилди, дея хабар бермоқда Reuters.
Аризаларни қабул қилиш 2026-йилнинг тўртинчи чорагида бошланиши режалаштирилган. Иқтисодиёт вазирлиги маълумотига кўра, чет элликлар 350 минг доллар миқдорида қайтарилмайдиган бадал тўлаш ёки 800 минг долларлик давлат облигацияларини сотиб олиш орқали фуқаролик олишлари мумкин.
Оила аъзолари учун тўлов
Янги дастур асосий аризачининг оила аъзолари учун ҳам фуқаролик олиш имконини беради. Аризачининг турмуш ўртоғи, шунингдек, 18 ёшдан 25 ёшгача бўлган, турмуш қурмаган ва фарзандлари бўлмаган фарзандлари қўшимча 100 минг доллар бадал эвазига фуқаролик учун ариза бериши мумкин.
18 ёшга тўлмаган фарзандлар учун эса бадал миқдори 25 минг доллар этиб белгиланган.
Аргентина ҳукумати дастур орқали иқтисодиётга қўшимча молиявий ресурслар жалб қилишни кутмоқда. Reuters маълумотига кўра, мамлакатда ойлик инфляция Хавер Милей президентликка киришган 2023 йил декабридаги 25,5 фоиздан 2026 йил август ойида 1,7 фоизга тушган.
Эслатиб ўтамиз, 2025-йил декабрида АҚШ ҳукумати мамлакат иқтисодиётига қўшимча сармоя жалб қилиш мақсадида «Трампнинг олтин картаси» деб номланган янги иммиграция дастурини эълон қилган эди.
