Бизнес-омбудсман аралашувидан сўнг 6,75 млрд сўмлик хато чекни таҳрирлашга рухсат берилди
Наманганда тадбиркорнинг онлайн кассасига техник хато сабаб 450 минг сўмлик дизель ёқилғиси ўрнига 450 минг литр киритилган ва натижада 6,75 млрд сўмлик чек шаклланган.
© nalog.gov.ru/Наманган вилоятининг Мингбулоқ туманида фаолият юритувчи «А.Т.Х.» МЧЖ раҳбари юзага келган муаммони ҳал этишда ёрдам сўраб Бизнес-омбудсманга мурожаат қилган.
Аниқланишича, 2026 йил май ойида онлайн назорат-касса машинаси орқали чек расмийлаштирилаётганда техник хатолик сабаб 450 минг сўмлик дизель ёқилғиси ўрнига 450 минг литр миқдори киритиб юборилган.
Натижада онлайн назорат-касса машинасида 6 млрд 750 млн сўмлик чек шаклланган. Шу сабабли корхонага амалда мавжуд бўлмаган фойда ва тегишли равишда асоссиз солиқ мажбуриятлари ҳисобланган.
Тадбиркор хатони тузатиш ва нотўғри расмийлаштирилган чекни таҳрирлаш бўйича мурожаат қилган. Бироқ таҳрирлаш муддати ўтиб кетгани сабабли унга амалий ёрдам кўрсатилмаган.
Бизнес-омбудсман судга ариза берди
Шундан сўнг Бизнес-омбудсман тадбиркор манфаатларини кўзлаб Наманган туманлараро маъмурий судига ариза киритган.
Суд ишни кўриб чиқиб, аризани тўлиқ қаноатлантирган. Тадбиркорнинг нотўғри шакллантирилган чекни таҳрирлаш бўйича мурожаатини рад этиш ҳаракатлари қонунга хилоф деб топилган.
Суд қарори билан Солиқ қўмитаси ва Наманган вилояти солиқ бошқармаси зиммасига тадбиркорга нотўғри шакллантирилган назорат-касса чекини таҳрирлаш имкониятини яратиш мажбурияти юклатилган.
Амалдаги тартибга кўра, илгари амалга оширилган ҳисоб-китобларга ўзгартириш киритиш зарур бўлган ҳолларда фойдаланувчи томонидан тузатувчи касса чеки шакллантирилади. Бу тартиб Вазирлар Маҳкамасининг 2019 йил 23 ноябрдаги 943-сон қарори билан тасдиқланган низомнинг 38-1-бандида белгиланган.
