Бизнес-омбудсман Тошкентнинг «Дизайн-коди» қарорини қайта кўриб чиқишни талаб қилди
Ўзбекистон Республикаси Бизнес-омбудсмани Тошкент шаҳрида жорий этилиши режалаштирилган «Дизайн-коди» бўйича қарорнинг айрим нормалари тадбиркорлик фаолиятига салбий таъсир кўрсатиши ва амалдаги қонунчиликка зид келиши қайд этилди.
© Vaqt.uz | Javhar ChorshanbiyevaТошкент шаҳар Халқ депутатлари кенгашининг 2026 йил 17 февралда қабул қилинган қарори билан пойтахтда «Дизайн-коди» қоидаларини амалиётга жорий этиш чора-тадбирлари белгиланган. Қарор тадбиркорлик муҳитига таъсири нуқтаи назаридан ўрганилди.
Қарор Бизнес-омбудсман билан келишилмасдан қабул қилинган
Таҳлил давомида қарор «Норматив-ҳуқуқий ҳужжатлар тўғрисида»ги Қонун талабларига мувофиқ Бизнес-омбудсман билан келишилмасдан қабул қилингани аниқланган. Қонунчиликка кўра, тадбиркорликка таъсир қилувчи ҳужжатлар мажбурий тарзда ваколатли орган билан келишилиши шарт.
Шунингдек, ҳужжатда реклама воситалари учун белгиланган «паст тўйинган» ва «нейтрал» ранг каби тушунчаларнинг аниқ ҳуқуқий мезонлари очиб берилмаган. Бу эса тадбиркорларнинг рўйхатдан ўтган брендлари ва интеллектуал мулк ҳуқуқларига таъсир қилиши мумкин.
Белгиланган уч ойлик муддат ҳам етарли эмас
Бизнес-омбудсман янги талабларга мослашиш учун белгиланган уч ойлик муддат ҳам етарли эмаслигини таъкидлади. Ваколатхона фикрича, ўзгаришлар тадбиркорларга ортиқча молиявий ва ташкилий юклама юкламаслиги учун босқичма-босқич жорий қилиниши керак.
Шу асосда қарорнинг тадбиркорликка дахлдор қисмларини қайта кўриб чиқиш, айрим нормаларга ўзгартириш киритиш ва унинг амалга кириш муддатини узайтириш бўйича расмий таклиф киритилди.
Тадбиркор зарарини ким қоплайди?
Тошкент кўчаларида ягона дизайн коди жорий этилаётгани ижобий баҳоланмоқда. Чунки шаҳарсозлар фикрича, бу орқали кўчалар ортиқча визуал «чиқиндилар»дан тозаланади.
Бироқ сўнгги бир неча ойдан буён тадбиркорларни қийнаб келаётган муаммо ҳам йўқ эмас. Нега пешлавҳаларни олиб ташлаш масаласида тадбиркорларга олдиндан тушунтириш берилмаган?
Хусусан, VAQT.UZ билан гаплашган дўкон эгаси my.gov.uz портали орқали рухсат олганига қарамасдан, пешлавҳасини бузиб кетишганини айтган.
Тошкент шаҳар ҳокимлиги матбуот котиби Гулноза Қосимова тадбиркорлар компенсация учун туман ҳокимликларига мурожаат қилиши мумкинлигини маълум қилди.
«Яъни биз хатоликларни инкор қилмаймиз. Агар шу жараёнда жабр кўрган тадбиркорлар бўлса, туман ҳокимлигига компенсация учун мурожаат қилишлари мумкин», – деди у.
