«BYD» фойдаси 38 фоизга тушди: Хитой электромобил бозорида талаб нега пасаймоқда?
«BYD» фойдаси пасайиши Хитой электромобил бозоридаги умумий секинлашувни кўрсатмоқда. Талаб, рақобат ва субсидиялар таъсири.
Хитойнинг энг йирик электромобил ишлаб чиқарувчиси «BYD» 2025-йилнинг тўртинчи чорагида соф фойданинг ўтган йилнинг шу даврига нисбатан 38 фоизга камайганини қайд этди. Бу ҳақда компаниянинг молиявий ҳисоботига таяниб, «Nikkei Asia» хабар берди.
Фойда камайиши
Қайд этилишича, «BYD» фойдаси кетма-кет учинчи чорак давомида пасаймоқда, бу ички бозорда талабнинг сусайиши ва модел линиясиининг эскиргани билан изоҳланмоқда.
31-декабрда якунланган уч ойлик натижаларга кўра, компания 9,3 млрд юан (1,35 млрд доллар) соф фойда кўрган, бу таҳлилчилар кутган 12,29 млрд юанга нисбатан анча кам. Ушбу даврда тушум 237,7 млрд юанни ташкил этиб, 13,5 фоизга қисқарган.
Йиллик ҳисобда «BYD» соф фойдаси 19 фоизга камайиб, 32,6 млрд юанга (4,72 млрд доллар) тушган, бу 2021-йилдан бери биринчи пасайишдир. Шу билан бирга, тушум атиги 3 фоизга ўсиб, 804 млрд юанга (112 млрд доллар) етган ва сўнгги олти йилдаги энг секин ўсишни кўрсатган.
Электромобиллар бозори қисқариши
Компания бу рентабеллик пасайишини нархлар бўйича рақобатнинг кучайиши ва агрессив маркетинг воситаларидан фаол фойдаланиш билан изоҳламоқда.
Сентябрдан бери «BYD» сотувлари олти ой давомида пасайишда: харидорлар автомобил сотиб олишни кечиктирмоқда ёки рақобатчиларнинг жозибадорроқ таклифларини танламоқда.
2026-йил январ–феврал ойларида, электромобилларга давлат субсидиялари бекор қилинганидан сўнг, компания 400 мингдан ортиқ автомобил сотган, бу ўтган йилнинг шу даврига нисбатан 36 фоизга кам. Хитой автомобил ишлаб чиқарувчилари ассосацияси маълумотларига кўра, бу вақт ичида Хитойдаги электромобиллар бозори умумий ҳисобда 27,5 фоизга қисқарган.
Вазият ўзгариши мумкин
«BYD» акциялари Ҳонгконг сток бозорида май ойида қайд этилган энг юқори кўрсаткичидан қарийб 40 фоизга тушиб кетган.
«BofA Global Research»нинг Буюк Хитой минтақаси бўйича автомобил ва саноат сектори тадқиқотлари раҳбари Мин Хсун Ли таъкидлашича, «BYD» ягона ҳолат эмас, бутун тармоқ сотувлар секинлашуви билан тўқнаш келмоқда.
Шу билан бирга, унинг сўзларига кўра, Эрондаги уруш фонида бензин нархларининг ошиши компания фойдасига ишлаши ва электромобилларга талабни рағбатлантириши мумкин.
