«Чинор» метро бекати 50 кунга ёпилади
Тошкент метросининг «Чинор» бекати 13 июндан бошлаб реконструкция ишлари сабабли вақтинча фаолиятини тўхтатади.
© transphoto.orgТошкент метрополитени «Чилонзор» йўналишида жойлашган «Чинор» метро бекати 13 июндан бошлаб вақтинча ёпилишини маълум қилди. Метрополитен матбуот хизматига кўра, бекатда кенг кўламли реконструкция ишлари амалга оширилади.
Лойиҳа доирасида:
— бекатнинг кириш ва чиқиш қисмлари кенгайтирилади;
— кексалар, ногиронлиги бўлган шахслар ва болали оилалар учун шароитларни яхшилаш мақсадида 4 та катта сиғимли лифт қўйилади;
— йўловчилар оқимини тезлаштириш учун қўшимча 12 та турникет ҳам ўрнатилади.
Бекат ёпилган даврда «Чинор» ва «Янгиҳаёт» метро бекатлари ўртасида бепул метробуслар қатнови ташкил этилади. Махсус метробуслар белгиланган жадвал асосида ҳаракатланади.
«Юзага келиши мумкин бўлган вақтинчалик ноқулайликлар учун узр сўраймиз. Амалга оширилаётган мазкур ишлар метро инфратузилмасини янада такомиллаштириш, хизмат кўрсатиш сифатини ошириш ҳамда йўловчилар учун янада қулай ва замонавий шароитлар яратишга қаратилган», — дейилади метрополитен баёнотида.
