Dashin aeroporti qiymati va texnologiyalari: 63 mlrd dollarlik megaloyiha
Dashin aeroporti – ustunsiz dizayn, robotlar va ilg‘or texnologiyalar uyg‘unligidagi zamonaviy aviatsiya markazi.
Bugungi kunda Xitoy deyarli barcha sohalarda dunyoni hayratlantirishga ulgurmoqda. Bu qudratning yana bir yorqin isboti – Pekin shahridagi Dashin (Daxing) xalqaro aeroporti. Ushbu inshoot o‘zining ko‘lami va texnologik imkoniyatlari bilan zamonaviy muhandislikning haqiqiy mo‘’jizasidir.
Dashin terminali kattaligi bo‘yicha dunyoda 1-o‘rinda turadi. Uning terminal binosi naqd 700 000 kvadrat metr maydonni egallaydi. Taqqoslash uchun, Dubay yoki Istanbul kabi yirik havo bandargohlarida terminallar bir nechta binolardan iborat bo‘lsa, Dashinda barchasi bitta yaxlit tom ostida birlashgan. Bu esa millionlab yo‘lovchilar uchun misli ko‘rilmagan qulaylik yaratadi.
Pekinning janubida qad rostlagan bu majmua shunchaki aeroport emas, u Xitoyning kelajak haqidagi tasavvuridir. Ichkariga qadam qo‘yganingizda, o‘zingizni ilmiy-fantastik film qahramonidek his qilasiz.
Loyiha iqtisodiy jihatdan ham ulkan: faqat terminal va uchish yo‘laklarining o‘zi 11,5-17 milliard dollarga baholangan. Agar unga tutash tezyurar poyezd yo‘llari, avtomobil magistrallari va aeroport shaharchasini qo‘shsak, umumiy qiymat 63 milliard dollardan oshib ketadi. Bu uni insoniyat tarixidagi eng qimmat transport loyihalaridan biriga aylantiradi.
Dashin terminalining eng hayratlanarli jihati – uning markaziy qismida birorta ham tayanch ustuni yo‘qligidir. Bu ochiqlik va erkinlik hissini beradi. Shuningdek, bino dunyodagi eng xavfsiz inshootlardan biri sanaladi. Bino ostiga 1100 dan ortiq seysmik izolyatorlar o‘rnatilgan bo‘lib, hatto kuchli zilzila paytida ham aeroport yer bilan silkinmaydi, balki maxsus «yostiqlar» ustida muloyim tebranib, yo‘lovchilar va texnologiyalarni himoya qiladi.
Dashin nafaqat ulkan, balki o‘ta aqlli hamdir. Bu yerda sizga yo‘l ko‘rsatuvchi, savollaringizga javob beruvchi, hatto kofe damlab beruvchi robot-assistentlar xizmat qiladi.
Shovqinli parvozlar orasida hordiq chiqarishni xohlovchilar uchun esa terminal ichida Xitoy madaniyatini aks ettiruvchi maxsus bog‘lar barpo etilgan. Ushbu bog‘lar yo‘lovchilarga toza havodan bahramand bo‘lish va Sharq falsafasini his qilish imkonini beruvchi o‘ziga xos «ekotizim»dir.
Teglar
