Элвира Набиуллина: Россия тарихида ҳали бундай ишчи кучи танқислиги бўлмаган

Россия Марказий банки раиси Элвира Набиуллина «Алфа-Саммит»даги чиқишида замонавий Россия тарихида ишчи кучи тақчиллиги ҳозиргидек даражага ҳеч қачон чиқмаганини таъкидлади. Унинг сўзларига кўра, меҳнат бозоридаги бу аномал ҳолат иқтисодий циклнинг ўзига хос хусусиятига айланди ва бутун иқтисодий вазиятга таъсир ўтказмоқда. Марказий банк асосий ставка ва бошқа пул-кредит сиёсати чораларини кўриб чиқишда айнан кадрлар етишмовчилиги омилини биринчи навбатда ҳисобга олмоқда.

Ҳозирда Россияда ишсизлик даражаси Халқаро меҳнат ташкилоти методологияси бўйича 2,2 фоизгача пасайган бўлиб, иқтисодиётда 74,7 миллион киши банд. Бироқ экспертлар паст ишсизликни ижобий кўрсаткич эмас, балки иқтисодиётнинг «қизиб кетгани» ва ресурслар тугагани белгиси сифатида баҳоламоқдалар. Иқтисодий тараққиёт вазирлиги ва Марказий банк таҳлилчилари яқин йилларда ишсизлик 2,5–3 фоиз атрофида сақланиб қолишини прогноз қилишмоқда, бу эса ишчи кучи учун кураш янада кучайишини англатади.

Кадрлар дефицити ва хатарлар

Россия саноатчилар ва тадбиркорлар иттифоқи (РССП) ҳисоб-китобларига кўра, 2030 йилга бориб Россия иқтисодиётида кадрлар танқислиги 3 миллиондан ортиқ кишини ташкил этиши мумкин. Набиуллинанинг таъкидлашича, бу вазиятда иқтисодиётни тўғри бошқариш учун меҳнат бозори ҳақида янада тезкорроқ ва аниқроқ маълумотлар зарур. Росстат ҳисоботлари бир ойлик кечикиш билан чиқаётгани регуляторга реал вақт режимида қарор қабул қилишда қийинчилик туғдирмоқда.

Ишчи кучининг етишмаслиги корхоналарни маошларни оширишга мажбур қилади, бу эса ишлаб чиқариш ҳажми ошмаган шароитда инфляцияни юқорига итаради.

Шу сабабли, Марказий банк учун ишчи кучи тақчиллиги — инфляцияга қарши курашдаги асосий қийинчиликлардан биридир. Россия иқтисодиёти кадрлар етишмовчилигини технологик янгиланиш ёки миграция ҳисобига тўлдира олмаса, яқин келажакда иқтисодий ўсиш суръатлари сезиларли даражада секинлашиши мумкин.