Endi o‘zbekistonliklar AQSHga ko‘chib keta olmaydi: Ularga doimiy yashash uchun viza berish to‘xtatildi

​AQSH prezidenti Donald Tramp ma’muriyati dunyoning 75 ta davlati, jumladan, O‘zbekiston fuqarolari uchun immigrant vizalari berishni noma’lum muddatga to‘xtatish haqida qaror qabul qildi, bu mamlakatga qonuniy migratsiya yo‘llarini cheklash yo‘lidagi eng keskin qadamlardan biri bo‘ldi, deya xabar bermoqda «The Guardian».

​Donald Tramp ma’muriyati tomonidan joriy etilgan yangi cheklovlar 21-yanvardan boshlab kuchga kiradi va asosan hukumat tomonidan «ijtimoiy yuk» bo‘lishi mumkin deb topilgan arizachilarni nishonga oladi.

Davlat departamentining Guardian nashri ixtiyoriga tushgan hujjatlariga ko‘ra, bu ro‘yxatga Afrika, Osiyo, Lotin Amerikasi va Sharqiy Yevropaning o‘nlab mamlakatlari kiritilgan. Ushbu chora Amerika soliq to‘lovchilarining mablag‘larini tejash va milliy manfaatlarni himoya qilish maqsadida amalga oshirilmoqda.

​Mazkur keng ko‘lamli taqiqqa tushgan davlatlar orasida Markaziy Osiyo mintaqasidan O‘zbekiston, Qozog‘iston va Qirg‘iziston nomlari qayd etilgan bo‘lsa, Tojikiston, Turkmaniston fuqarolari uchun hozircha bunday cheklov ko‘zda tutilmagan.

Shuningdek, Kavkaz mintaqasidan Ozarboyjon, Armaniston va Gurjiston ham ro‘yxatdan joy olgan. Cheklovning asosiy mezoni sifatida arizachining kelajakda AQSH hukumati nafaqalariga qaram bo‘lib qolish ehtimoli olingan.

​Yangi tartibga ko‘ra, agar arizachining vizasi tasdiqlangan, ammo hali pasportga chop etilmagan bo‘lsa, konsullik xodimlari ishni ko‘rib chiqishni rad etishi shart qilib belgilandi. Bu jarayonda faqat istisno holatlargina mavjud bo‘lib, ular ikki fuqarolikka ega shaxslarga (agar ikkinchi davlat ro‘yxatda bo‘lmasa) taalluqlidir. Shuningdek, arizachi o‘z tashrifi AQSHning «Birinchi navbatda Amerika» milliy strategiyasi manfaatlariga bevosita xizmat qilishini isbotlab berishi kerak bo‘ladi.

​Ro‘yxatdan Rossiya, Belarus, Moldova kabi Sharqiy Yevropa davlatlari bilan bir qatorda, Yaqin Sharq va Janubiy Osiyoning Pokiston, Bangladesh kabi yirik migratsiya markazlari ham joy olgan. Bu qaror AQSHning uzoq yillik ittifoqchilari va migratsiya aloqalari mavjud bo‘lgan davlatlarga ham birdek ta’sir ko‘rsatadi.

​Davlat departamentining ko‘rsatmasiga binoan, konsullik bo‘limlari yangi tartibni ijro etish uchun tayyorgarlik ko‘rmoqda va cheklovning amal qilish muddati hozircha noma’lum qolmoqda.

Hujjatda aytilishicha, mazkur chora Amerika iqtisodiyotini himoya qilish va kelayotgan shaxslarning moliyaviy mustaqilligini ta’minlashga qaratilgan strategik qadamdir.

​Mana urushdan jabr ko‘rgan davlatlar, AQSH ittifoqchilari va Amerika bilan uzoq yillik migratsiya aloqalariga ega mamlakatlarni o‘z ichiga olgan to‘liq ro‘yxat:

​Afg‘oniston

Albaniya

Jazoir

Antigua va Barbuda

Armaniston

Ozarboyjon

Bahama orollari

Bangladesh

Barbados

Belarus

Beliz

Butan

Bosniya va Gertsegovina

Braziliya

Myanma

Kambodja

Kamerun

Kabo-Verde

Kolumbiya

Kot-d'Ivuar

Kuba

Kongo Demokratik Respublikasi

Dominika

Misr

Eritreya

Efiopiya

Fiji

Gambiya

Gurjiston

Gana

Grenada

Gvatemala

Gvineya

Haiti

Eron

Iroq

Yamayka

Iordaniya

Qozog‘iston

Kosovo

Kuvayt

Qirg‘iziston

Laos

Livan

Liberiya

Liviya

Shimoliy Makedoniya

Moldova

Mongoliya

Qoratog‘ (Chernogoriya)

Marokash

Nepal

Nikaragua

Nigeriya

Pokiston

Kongo Respublikasi

Rossiya

Ruanda

Sent-Kits va Nevis

Sent-Lyusiya

Sent-Vinsent va Grenadin orollari

Senegal

Siyerra-Leone

Somali

Janubiy Sudan

Sudan

Suriya

Tanzaniya

Tailand

Togo

Tunis

Uganda

Urugvay

O‘zbekiston

Yaman