Эрон АҚШ билан музокараларни тўхтатди

Эронлик музокарачилар АҚШ вакиллари билан хабар алмашишни тўхтатди. Бу ҳақда Эроннинг давлатга қарашли «Tasnim» агентлиги маълум қилди.

Ушбу қарор Исроилнинг Ливандаги «Ҳизбуллоҳ» гуруҳи объектларига берган зарбалари ортидан қабул қилинган. Эрон томонининг таъкидлашича, Ливан АҚШ билан тузилган сулҳ шартлари қаторига киритилган эди, бироқ жанговар ҳаракатлар барча жабҳаларда давом этмоқда.

Шунингдек, Теҳрон Ҳўрмуз бўғози орқали ҳаракатланишни тўлиқ тўсиб қўйиш ва бошқа жабҳаларни, жумладан, Боб ул-Мандаб бўғозини ҳам фаоллаштириш ниятида эканини билдирган.

Сулҳнинг бузилиши ва ўзаро зарбалар

Эрон ва АҚШ жорий йилнинг апрель ойи бошида сулҳга келишиб олган эди. Бир неча ҳафта ўтгач, ўт очишни тўхтатиш режими Исроил ва Ливанга ҳам татбиқ этилди. Бироқ келишувга қарамай, томонлар ўзаро зарбалар беришни давом эттирмоқда.

Хусусан, май ойи охирида АҚШ Эронга янги «мудофаа зарбаларини» йўллади, Теҳрон эса бунга жавобан Америка авиабазасига ҳужум қилганини эълон қилди.

Исроил бош вазири Бинямин Нетаняху Ливанда қуруқликдаги операцияни кенгайтириш ҳамда Байрутнинг жанубий чеккаларига, жумладан, «Ҳизбуллоҳ»нинг асосий таянчи бўлган Дахияга зарбалар беришга буйруқ берди. Эрон эса Исроилнинг бу босқинчилик ҳаракатларини сулҳни бузиш деб баҳолаб, бунинг оқибатларидан огоҳлантирди.

Айни пайтда Эрон ва АҚШ урушни якунлаш бўйича келишувга эриша олмаяпти. Исроилнинг Ливанга бераётган зарбалари музокаралар жараёнини янада секинлаштиряпти.