Google Gemini ChatGPT’га жиддий яқинлашмоқда — рақобат кескинлашди

Сунъий интеллект бозорида кучлар мувозанати ўзгариб бормоқда. TechCrunch нашринринг Sensor Tower таҳлилига таяниб хабар беришича, ChatGPT’нинг жадал ва чекловсиз ўсиш даври секинлашмоқда, Google’нинг Gemini тизими эса тобора илғорлаб, бозор етакчисига яқинлашаётгани кузатилмоқда.

Сўнгги маълумотларга кўра, ChatGPT ҳали ҳам сектордаги энг йирик ўйинчи: глобал мобил юкламаларнинг ярми ва фаол ойлик аудиториянинг 55 фоизи унинг ҳиссасига тўғри келади. Бироқ август–ноябр даврида фаол фойдаланувчилар сони атиги 6 фоизга ўсиб, 810 млнга етди. Шу билан бирга, бозор улуши тўрт ойда 3 пунктга камайди, иловада ўтказилган вақт эса июлга нисбатан 10 фоиз пасайди.

Google эса аксинча — тажовузкор ўсишини намоён этмоқда. Ўша даврда Gemini’нинг аудиторияси 30 фоизга ошди. Сентябрда ишга туширилган Nano Banana генерация модели фойдаланувчилар фаоллигини кескин оширди: ўртача кунлик фойдаланиш 120 фоизга кўтарилиб, 11 дақиқага етди. Қиёс учун, ChatGPT’да бу ўсиш атиги 6 фоизни ташкил этди.

Google’нинг энг катта стратегик устунлигини аналитиклар Android билан чуқур интеграция деб атайди. Gemini’дан операцион тизим интерфейси орқали фойдаланувчилар сони илова юклаб олувчилардан икки баравар кўп. Бу Google’га 3 млрддан ортиқ Android қурилмалари орқали улкан тарқатиш имкониятини беради.

OpenAI раҳбари Сэм Алтман ички жамоага «қизил код» юбориб, персонализация, ишончлилик ва сурат генерацияси бўйича тезкор такомиллаштириш талаб этилишини билдирган.

Рақобат фақат икки куч ўртасида эмас: Perplexity юкламаларни 215 фоизга, Claude эса аудиторияни 190 фоизга оширди.

Экспертлар фикрича, Google’нинг асосий қуроли — экотизим. СИ клавиатура, камера ва Android хизматларига бевосита жойлашиб, фойдаланувчи учун «кўринмас» технологияга айланмоқда; ChatGPT эса алоҳида илова сифатида рақобат олиб боришга мажбур.