Ҳаёт Банк стартаплар учун венчур жамғармасини ишга туширмоқда

Ўзбекистондаги хусусий банклардан бири бўлган Ҳаёт Банк эрта босқичдаги стартапларни қўллаб-қувватлаш учун тизимли Pre-Seed жамғармаси — «Hayot Ventures»ни ташкил этмоқда. Бу ҳақда банк матбуот хизмати хабар берди.

Қайд этилишича, жамғарма йилига 20–40 та стартапни қўллаб-қувватлайди.

«26-март куни «Янги Ўзбекистон» университети билан ҳамкорлик тўғрисида меморандум имзоланди ва бу қўшма акселерация муҳитини яратиш учун замин яратди. Ушбу стратегик иттифоқ доирасида банк MVP босқичидаги лойиҳаларга сармоя киритадиган ва йилига 20–40 та стартапни қўллаб-қувватлайдиган жамғарма ни ривожлантириб боради. Барча жамоалар маҳсулот ва молиявий моделни такомиллаштиришдан тортиб, ўсиш стратегиясини ишлаб чиқиш ҳамда инвестицияларнинг кейинги босқичига тайёргарлик кўришгача бўлган 12 ҳафталик акселерация дастуридан ўтади», - дейилади хабарда.

Сўнгги йилларда Ўзбекистон ҳукумати стартап экотизимини қонуний жиҳатдан тартибга солиш ва рағбатлантириш бўйича бир қатор муҳим ҳужжатларни қабул қилди. Хусусан, Президент фармонларида венчур фондлари фаолиятини эркинлаштириш ва инновацион лойиҳаларни қўллаб-қувватлаш устувор вазифа қилиб белгиланган.

Бироқ, бозорда ҳанузгача «Death Valley» (Ўлим водийси) — яъни стартап ғоядан бизнесга ўтиш жараёнида маблағ етишмаслиги муаммоси сақланиб қолмоқда.