Интернет юлдузига айланган маймунча IKEA'га кутилмаган фойда келтирди

Япониядаги зоопаркда онаси ташлаб кетган 6 ойлик Панч исмли макаканинг юмшоқ ўйинчоқ кўтариб юрган видеотасвирлари ижтимоий тармоқларда тез суръатда тарқалиб, кенг муҳокамаларга сабаб бўлмоқда.

Маймунчага нима бўлган ўзи?

Панч 2025 йил 26 июл куни 500 грамм вазнда туғилган. Илк бор туғруқни ёзнинг иссиғида бошдан кечирган онаси унга етарли ғамхўрлик кўрсатмаган. Боғ ходимларининг айтишича, маймунларда айрим ҳолатларда боласини ташлаб кетиш ҳолатлари учраб туради. Шу боис кейинги кундан бошлаб ходимлар ёш маймунчани қўлда парвариш қилишни бошлаган.

Аввал ходимлар бошқа она маймунлар Панчни қабул қилиб, уни парваришни ўз зиммасига олишини кутган. Бироқ бундай ҳолат кузатилмаган.

Натижада соғлом бўлган Панч вақтинча гуруҳдан ажратилган ва сут билан боқиш йўлга қўйилган.

Одатда бундай вазиятларда инкубатордан фойдаланилади. Аммо ходимлар маймунча кейинчалик гуруҳга осон мослашиши учун уни бошқа маймунларнинг ҳиди ва товушлари яқинида сақлаб, табиий муҳитга яқин шароит яратишга ҳаракат қилган.

Маймунчалар туғилгандан сўнг онасининг жунига ёпишиб, шу тарзда ривожланади. Панчда бу имконият бўлмагани сабабли ходимлар ўралган сочиқлар ва турли юмшоқ ўйинчоқларни синаб кўришган. У эса орангутан кўринишидаги ўйинчоқни танлаган.

Ходимлар таъкидлашича, унинг жуни ушлашга қулай ва ташқи кўриниши маймунга ўхшаш бўлгани Панчга хавфсизлик ҳиссини берган. У тунлари ҳам ўйинчоқни қучоқлаб ухлаган.

«Юмшоқ ўйинчоқ унга онасининг ўрнини босувчи бўлди», дейди боғ ходимларидан бири.

Ижтимоий тармоқлардаги қизиқиш

19 январ куни Панч тўлиқ равишда маймунлар гуруҳига қайтарилган. Дастлаб бошқа маймунлар уни қабул қилмаган. Панч эса юмшоқ ўйинчоғини қўйиб юбормай, доим ўзи билан олиб юрган. Видеоларда у каттароқ маймунларга эҳтиёткорлик билан яқинлашиб, меҳр излаётгани, аммо баъзан рад этилгани ёки эътиборсиз қолдирилгани акс этган.

5 феврал куни «Ichikava Siti Zoo» расмий Х аккаунтида: «Ҳозирда маймунлар тоғчаси ҳудудида юмшоқ ўйинчоқ кўтариб юрган ёш маймун бор», дея хабар берилиб, Панч таништирилган.

Кичик қаҳрамон тез орада интернет фойдаланувчилари эътиборини қозонган. Турли платформаларда унга нисбатан меҳр ва ҳимоя ҳисси билдирилган: «асраб олардим ва абадий яхши кўрар эдим», деб ёзди фойдаланувчилардан бири. Яна бири эса: «Уч кундан бери Панч сабабли йиғлаяпман», дея тан олган.

Зоопаркнинг боғ ва ботаника бўлими раҳбари Такаши Ясунага ташрифчилар Панчни яқиндан кўриш учун кўпроқ келаётганини, натижада ташрифлар сони одатий йилларга нисбатан ошганини маълум қилган.

IKEA сотувларининг ошиши

Маълум бўлишича, Панч қучоқлаб юрган ўйинчоқ IKEA брендига тегишли орангутан кўринишидаги «Djungelskog» модели бўлган.

Панчнинг ҳикояси IKEA ўйинчоғи савдосига ҳам сезиларли таъсир кўрсатган. Компания баёнотига кўра, сўнгги бир ҳафтада сотувлар 200 фоиздан ортиққа ошган. Жами 990 дан зиёд ўйинчоқ сотилган бўлиб, бу одатий ҳафталик ўртача 400 дона кўрсаткичдан икки баравар кўпдир.

Айниқса, Япония, АҚШ ва Жанубий Кореяда ушбу орангутан ўйинчоғига талаб кескин ортган. Дўконларда маҳсулот қолмагани айтилмоқда.

IKEA вакиллари харидорларни сабр қилишга чақириб, ўйинчоқ тез орада яна етказиб берилишини айтган.

Сотувлардаги кескин ўсиш нархларга ҳам таъсир қилган. Расмий нархи 16 доллар бўлган ўйинчоқ айрим интернет сайтларда 350 долларгача қимматлашган. «Djungelskog» IKEA сайтида беш юлдузли баҳога эга бўлиб, 1400 дан ортиқ шарҳ тўплаган. Тавсифида у «юмшоқ ва қучоқлашга мос» экани қайд этилган.

Панчнинг машҳурлиги ортидан IKEA Япониядаги зоопаркка бир қанча юмшоқ ўйинчоқлар ҳадя қилган ва рекламаларида маймунчадан фойдаланмоқда.

Панчнинг юракни эзувчи, бир вақтнинг ўзида умид бағишловчи ҳикояси оддий юмшоқ ўйинчоқни қисқа вақт ичида глобал трендга айлантирди.