Logo

Жаҳонгир Ортиқхўжаевнинг АҚШ компанияси Тошкентдаги яна 6 та меҳмонхонани ўз портфелига қўшмоқчи

Bugun 08:303 daqiqa

2019-йилда давлатга беғараз топширилиши ваъда қилинган Hilton Tashkent City меҳмонхонаси ҳам аввалроқ ушбу компания таркибига ўтказилганди.

Жаҳонгир Ортиқхўжаевнинг АҚШ компанияси Тошкентдаги яна 6 та меҳмонхонани ўз портфелига қўшмоқчи

АҚШда рўйхатдан ўтган «TEG Overseas» компаниясининг Ўзбекистондаги шўбаси «TEG SPV» ва «Dreams Island» МЧЖ ўртасида Тошкентдаги «Alfraganus» меҳмонхоналар мажмуасини ўтказиш бўйича дастлабки келишув имзоланди. Бу ҳақда компаниянинг АҚШ Қимматли қоғозлар ва биржалар комиссиясига (SEC) 6-ноябр куни тақдим этган ҳисоботида маълум қилинди.

3-ноябрда имзоланган келишувга кўра, «TEG SPV» «Dreams Island»га тегишли 6 та меҳмонхонадан иборат мажмуани ўз балансига олиши режалаштирилмоқда.

Ҳар иккала компания ҳам Жаҳонгир Ортиқхўжаевга тегишли «AKFA Group» таркибига киради.

Шартномада мажмуани ўтказиш нархи ҚҚС билан бирга 12 млрд сўм (шартнома тузилган санадаги курс бўйича тахминан 1 млн доллар) этиб белгиланган. Бундан ташқари, «TEG SPV» «Dreams Island»нинг Қозоғистоннинг «Halyk Bank» банки билан 2025-йил 20-мартда тузилган 100 млн долларлик кредит шартномаси бўйича мажбуриятларини ҳам ўз зиммасига олиши керак.

Мажмуа таркиби ва кредит шартлари

Тошкент шаҳрининг Миробод туманида жойлашган «Alfraganus» мажмуаси умумий сиғими 1 210 та хонадан иборат олтита халқаро меҳмонхона бренди ҳамда 7 200 квадрат метр майдонга эга конференция ва тадбирлар марказини ўз ичига олади:

• «Hyatt Place» — 201 хона;
• «Hilton Garden Inn» — 200 хона;
• «Fairfield by Marriott» — 204 хона;
• «ibis» — 202 хона;
• «Holiday Inn Express» — 202 хона;
• «Wyndham Garden» — 201 хона.

«TEG Overseas» маълумотига кўра, мажмуа қурилиши якуний босқичда бўлиб, объектлар босқичма-босқич фойдаланишга топширилмоқда.

Барча меҳмонхоналарни 2027-йилнинг иккинчи чорагида ишга тушириш кутилмоқда.

«Halyk Bank»дан олинган 100 млн долларлик кредит аввалги кредитни қайта молиялаштириш ва мажмуани қуришга йўналтирилган.

Кредитнинг йиллик ставкаси 8 фоизни ташкил этади, қарздорнинг айланмаси бўйича белгиланган шарт бажарилмаса, ставка 8,5 фоизга ошади. Асосий қарзни қайтариш 2027 йил апрелидан бошланиб, 2031 йил охиригача тўлиқ қопланиши белгиланган.

Кафиллар сифатида «Artel Electronics», «Artel Electronics Manufacturing», «Quality Device» ва «AKFA Dream World» компаниялари кўрсатилган, таъминотга эса бинолар, ускуналар ҳамда «Dreams Island» устав капиталидаги 100 фоизлик улуш гарови киради.

Компания эгалари ва аввалги активлар

АҚШнинг Невада штатида рўйхатдан ўтган «TEG Overseas» (аввалги «StageWise Strategies Corp.») акциялари OTC бозорида TEGO белгиси остида котировка қилинади.

Компания акцияларининг камида 99,4 фоизи Ортиқхўжаевлар оиласи назоратида: 68,3 фоизи Жаҳонгир Ортиқхўжаев 99,93 фоиз улушга эгалик қилувчи «Tourism and Entertainment Group» МЧЖга, 31,14 фоизи эса унинг қизи, директорлар кенгаши аъзоси Иродахон Абдуваҳидовага тегишли.

2026-йил 13-октябрдаги корпоратив битим натижасида «TEG SPV»нинг деярли 100 фоизлик улуши АҚШ компанияси тузилмасига киритилиб, унинг таркибига «Hilton Tashkent City» («AKFA Dream World»), Бухородаги «Wyndham» («Cultural Landmark Hotel») меҳмонхоналари ва «CAEx» кўргазмалар маркази ўтказилган эди.

Аввалроқ, 2019-йилда Жаҳонгир Ортиқхўжаев «Hilton» меҳмонхонаси қуриб битказилгач, давлатга беғараз топширилишини айтган эди.

«Alfraganus» бўйича янги келишув амалга ошса, «TEG Overseas»нинг Ўзбекистондаги меҳмонхоналар портфели иккита объектдан саккизтага кенгаяди.

Teglar

Mavzuga oid

Жаҳонгир Ортиқхўжаевнинг АҚШ компанияси Тошкентдаги яна 6 та меҳмонхонани ўз портфелига қўшмоқчи | Vaqt.uz