Jarima ballari 12 baldan oshgan haydovchilar soni 107 nafarga yetdi

O‘zbekistonda jarima ballari tizimi doirasida 12 baldan oshgan haydovchilar soni 107 nafarga yetdi. Endi ushbu fuqarolar sud qarori asosida haydovchilik huquqidan mahrum etiladi. Bu haqda Davlat yo‘l harakati xavfsizligi xizmati matbuot kotibi Zoir Yo‘ldoshov xabar berdi.

Amaldagi tartibga muvofiq, yo‘l harakati qoidalarini muntazam buzib, belgilangan jarima ballari limitidan oshgan haydovchilarga nisbatan ma’muriy chora qo‘llanadi. Bu jarayon sud orqali ko‘rib chiqiladi va haydovchilik guvohnomasini vaqtincha bekor qilishga olib kelishi mumkin.

Huquqdan mahrum etilgan haydovchilar keyinchalik qaytadan transport vositasini boshqarish huquqini tiklash uchun maxsus tartibdan o‘tishlari talab etiladi. Xususan, ular tegishli toifadagi avtomototransport vositalari haydovchilarini tayyorlash yoki qayta tayyorlash bo‘yicha o‘quv kurslarida to‘liq tahsil olishlari shart.

Shuningdek, haydovchilar maxsus nazariy imtihondan o‘tishlari lozim bo‘ladi. Imtihonda jami 50 ta savol beriladi va muvaffaqiyatli o‘tish uchun kamida 46 ta savolga to‘g‘ri javob berishi talab qilinadi.

Eslatib o‘tamiz, jarima ballari tizimi 2025 yil 1-iyundan boshlab joriy etilgan. Dastlab yo‘l-patrul xizmati xodimlari tomonidan tuzilgan bayonnomalar asosida ballar hisoblangan.

2026 yil 1-apreldan esa avtomatik kameralar orqali aniqlangan qoidabuzarliklar uchun ham ballar qo‘shila boshladi. Ular orasida svetoforga bo‘ysunmaslik, tezlikni oshirish va qarshi yo‘nalishda harakatlanish kabi qoidabuzarliklar bor.

Tizimga ko‘ra, haydovchi 8 ballga yetganda S orqali ogohlantiriladi, 12 balldan oshganda esa haydovchilik huquqi sud tartibida bekor qilinadi va uni qayta tiklash uchun qayta o‘qish hamda imtihon topshirish talab etiladi.