Mask SpaceX’ning 800 mlrd dollarga baholangani haqidagi xabarlarni rad etdi
Mediadagi xabarlarga javoban Ilon Mask kompaniya hech qanday yangi baholash asosida mablag‘ jalb qilmayotganini, aksiyalarni qayta sotib olish esa odatiy jarayon ekanini ta’kidladi.
Reuters xabariga ko‘ra, 6-dekabr kuni ommaviy axborot vositalari SpaceX kompaniyasi 800 milliard dollarlik baholanish asosida mablag‘ jalb qilayotgani haqida ma’lumot bergan. Biroq Ilon Mask ushbu ma’lumotlarni yolg‘on deb atab, ularni keskin rad etdi. Uning aytishicha, kompaniya hozirda bunday baholash bilan sarmoya jalb qilish jarayonida emas.
Mask X ijtimoiy tarmog‘idagi bayonotida SpaceX bir necha yildan buyon ijobiy pul oqimiga ega ekanini ta’kidladi. Uning qayd etishicha, kompaniya yiliga ikki marotaba xodimlar va mavjud sarmoyadorlar likvidlikni ta’minlash maqsadida aksiyalarni qayta sotib olish amaliyotini o‘tkazadi.
SpaceX dunyodagi eng yirik xususiy kosmik kompaniyalardan biri bo‘lib, oxirgi yillarda Starlink loyihasining kengayishi va raketa uchirishlarining ko‘payishi ortidan bozordagi bahosi alohida qiziqish uyg‘otib kelayotgandi. Shu bois, 800 milliard dollarlik baholanish haqidagi xabarlar keng muhokamaga sabab bo‘ldi.
