Misrga kirish vizasi 1-martdan qimmatlashadi
Yangi tariflar Qohira va Xurgada orqali keluvchi sayyohlarga tatbiq etiladi, Sharm ash-Shayxga boruvchi mehmonlar uchun «Sinay muhri» tartibi saqlanadi.
Misrga kirish vizasi 1-martdan 25 dollardan 30 dollarga oshiriladi va bu o‘zbekistonlik sayyohlarga ham taalluqli bo‘ladi. Qaror mamlakat Turistik kompaniyalar va agentliklar palatasi hujjatiga tayanib e’lon qilindi. Yangi narxlar asosan Qohira va Xurgada aeroportlari orqali kiruvchi xorijliklar uchun amal qiladi.
Narx oshishi sababi
Rasmiylarga ko‘ra, to‘lov miqdorining oshirilishi sayyohlarga ko‘rsatilayotgan xizmatlar sifatini yaxshilash va Misr turizm bozorining raqobatbardoshligini kuchaytirishga qaratilgan. Shu bilan birga, Sharm ash-Shayxga boruvchi mehmonlar uchun 15 kunlik bepul «Sinay muhri» amalda qoladi. Biroq ushbu hududdan tashqariga chiqishda odatiy viza rasmiylashtirish va to‘lov amal qiladi.
Kuz oylarida hukumat vizalar narxini 45 dollargacha oshirishni rejalashtirgan edi. Mazkur qonun loyihasi parlament tomonidan ma’qullangan, ammo yakunda amaliyotga joriy etilmagan. Amaldagi qaror esa nisbatan yumshoqroq shaklda qabul qilindi.
Oxirgi marta oshirilgan narx
Misr vizalar narxini oxirgi marta 2014 yil may oyida oshirgan. O‘shanda 30 kungacha bo‘lgan bir martalik ruxsatnoma 15 dollardan 25 dollargacha qimmatlashgan edi. 2017 yilda esa olti oylik ko‘p martalik viza 35 dollardan 60 dollargacha oshirildi. Bundan tashqari, mamlakatda 700 dollarlik besh yillik ko‘p martalik viza ham mavjud.
Statistikaga ko‘ra, 2026 yilning ilk oyida Misr o‘zbekistonliklar eng ko‘p tashrif buyurgan davlatlardan biri bo‘ldi. Ushbu davrda 4 585 nafar fuqaro mazkur yo‘nalishni tanlagan. Yangi tariflar turistik oqimga qanday ta’sir qilishi yaqin oylarda ma’lum bo‘ladi.
