Murojaatlar bilan ishlashda eng yomon banklar ma’lum qilindi
Fuqarolar murojaatlarini ko‘rib chiqish sifati bo‘yicha eng past natija qayd etgan banklar ro‘yxati e’lon qilinadi.
O‘zbekistonda banklarning fuqarolar murojaatlari bilan ishlash samaradorligini baholovchi maxsus indeks joriy qilindi. Bu haqda 13-iyun kuni Oliy Majlis Senatining yalpi majlisida Markaziy bank boshqaruvi raisi Timur Ishmetov ma’lum qildi.
Uning so‘zlariga ko‘ra, mazkur indeks asosida murojaatlar bilan ishlash bo‘yicha eng past ko‘rsatkich qayd etgan banklar ro‘yxati shakllantirilgan. Regulyator kelasi haftadan boshlab ushbu banklar nomini jamoatchilikka e’lon qilishni rejalashtirmoqda.
Timur Ishmetov bu tashabbus banklar tomonidan iste’molchilar huquqlarini himoya qilish va mijozlar bilan ishlash sifatini oshirishga xizmat qilishini ta’kidladi. Uning fikricha, shaffof reyting tizimi moliya muassasalarini mas’uliyatliroq ishlashga undaydi.
Shuningdek, bir oy ichida Markaziy bank ijtimoiy tarmoqlarda fuqarolarning bank xizmatlariga oid murojaatlari uchun ikkita yangi aloqa kanalini ishga tushiradi. Yangi tartibga muvofiq, murojaatlar bo‘yicha banklar bir soat ichida javob berishi va muammoni hal qilish choralarini ko‘rishi lozim bo‘ladi.
Markaziy bankdagi kamchiliklar
Markaziy bank rahbari tizimning o‘zida ham kamchiliklar mavjudligini tan oldi. Uning ma’lum qilishicha, o‘tgan oyda Call-markaz yangilanib, zamonaviy kontakt-markazga aylantirildi va hozirda sinov rejimida ishlamoqda.
Natijada murojaatlar soni qariyb olti barobar oshgan. Ilgari ko‘plab fuqarolar Markaziy bankka qo‘ng‘iroq qilishda qiyinchilikka duch kelgani sababli murojaatlarni qabul qilish darajasi past bo‘lgan. Regulyator yaqin oylarda kontakt-markaz faoliyati bo‘yicha alohida hisobot taqdim etishni ham rejalashtirmoqda.
Timur Ishmetovning ta’kidlashicha, 2025 yildan boshlab banklar tomonidan mijozlar huquqlarini himoya qilish va murojaatlar bilan ishlash sohasida sezilarli ijobiy o‘zgarishlar kuzatilishi kutilmoqda.
