«Nvidia»дан янги инқилобий қадам: сунъий интеллект учун махсус процессор
График чиплар бозорининг мутлақ етакчиси сунъий интеллект моделларининг жавоб бериш тезлигини оширишга қаратилган янги тизимни ишлаб чиқмоқда.
«Nvidia» компанияси сунъий интеллект соҳасида маълумотларни қайта ишлашни тезлаштирадиган янги процессорни тақдим этишга тайёрланмоқда.
«The Wall Street Journal» нашрининг хабар беришича, ушбу ишланма «OpenAI» ва бошқа гигантларга янада самарали СИ-инструментларини яратиш имконини беради. Янги тизим асосан инференс — СИ моделларининг фойдаланувчи сўровларига реал вақт режимида жавоб бериш технологиясига ихтисослашган. Янги платформа шу йилнинг март ойида Сан-Хоседа ўтадиган «Nvidia GTC» конференциясида намойиш этилиши кутилмоқда.
Ушбу лойиҳа доирасида «Nvidia» «Groq» стартапи томонидан ишлаб чиқилган технологиялардан фойдаланишни режалаштирган.
«OpenAI» аллақачон янги процессорнинг энг йирик фойдаланувчиларидан бири бўлишга розилик берган. Феврал охирида компания «Nvidia»дан «инференс учун ажратилган қувватларни» сотиб олиш бўйича йирик келишув имзоланганини билвосита тасдиқлади. Бу қадам бозордаги мавжуд чипларнинг юқори энергия истеъмоли ва қимматлиги билан боғлиқ норозиликлар фонида амалга оширилмоқда.
Ҳозир кўплаб компаниялар «GPU» чиплари СИ агентларини бевосита ишга тушириш учун ҳар доим ҳам оптимал эмаслигини таъкидламоқда. Шу сабабли «OpenAI» ва бошқа мижозлар муқобил вариантларни қидираётган эди. Янги процессор айнан шу бўшлиқни тўлдириши ва «Nvidia»нинг бозордаги етакчилигини мустаҳкамлаши лозим. Бу компания учун рақобатчилар босимига жавобан ташланган стратегик юришдир.
Рақобат ва бозордаги босим
«Nvidia» узоқ вақт давомида график процессорлар бозорида яккаҳокимлик қилиб келаётган бўлса-да, илк бор ўз флагман маҳсулотларининг имкониятлари чекланганлиги муаммосига дуч келмоқда. «Google» ва «Amazon» каби технология гигантлари аллақачон инференс сегментида «Nvidia» билан рақобатлаша оладиган ўз чипларини ишлаб чиқишга улгурган. Бу эса компанияни тезроқ ва тежамкорроқ ечимларни тақдим этишга мажбур қилмоқда.
СИ моделларини ўқитишдан кўра, уларни кундалик сўровларга жавоб беришга мослаштириш жараёни каттароқ бозорга айланиб бормоқда. «Nvidia»нинг янги тизими айнан шу йўналишдаги харажатларни камайтириши кутилмоқда. Агар янги чиплар кутилган натижани берса, ИИ-инструментларининг ишлаш тезлиги бир неча баробарга ортиши мумкин. Бу эса бутун соҳадаги технологик ривожланишни янги босқичга олиб чиқади.
Мазкур янгилик «Nvidia» акциялари ва капиталлашувига ҳам ижобий таъсир кўрсатиши тахмин қилинмоқда.
