Ню-Йоркда 61 йиллик анъана бузилди: Мамдани Исроил парадидан бош тортди
1964 йилдан бери биринчи марта Ню-Йоркнинг амалдаги мэри Исроил куни парадида иштирок этмайди.
Ню-Йорк мэри, демократ-социалист Зохран Мамдани Исроил куни шарафига ўтказиладиган йиллик тарихий парадда қатнашмайди. Бу ҳақда «Fox News» хабар берди.
Қайд этилишича, Мамдани 1964 йилдан бери ушбу тадбирда иштирок этишдан ўз хоҳиши билан воз кечган биринчи амалдаги мэрга айланган.
Шаҳарнинг энг йирик яҳудий ташкилотлари, жумладан «UJA-Federation», бу қарорга норозилик сифатида мэр қароргоҳида яҳудийлар мероси шарафига уюштириладиган расмий қабулда қатнашишдан бош тортди.
Ташкилотлар «меросларининг асосий устунини инкор этадиган» шахснинг тадбирларида иштирок этиш ниятида эмаслигини билдирган.
Сиёсий позиция ва хавфсизлик чоралари
Ню-Йорк мэри ўз қарорини «сиёсий тамойиллар» ва «барча инсонлар учун тенг ҳуқуқлар» тарафдори эканлиги билан изоҳлаган.
Шу билан бирга, шаҳар раҳбарининг парадда қатнашмаслиги тадбирда хавфсизликни таъминлашдан бош тортишни англатмаслиги маълум қилинди.
Маълумот учун, Исроилдан ташқаридаги энг йирик яҳудийлар жамоаси яшайдиган Ню-Йорк шаҳрида, Бешинчи авеню бўйлаб ўтказиладиган мазкур марш доимо икки партиянинг доимий анъанаси ва мегаполис бирдамлигининг рамзи ҳисоблаб келинган.
