Erkinjon Turdimovning yangi lavozimga tayinlanishi, xususiylashgan Paynet va talabalar yotoqxonasi sotilishi bo‘yicha Davaktiv izohi — 9-oktabr dayjesti

Davaktiv «Paynet» sotilishiga oid bitim tafsilotlarini ma’lum qildi

Davlat aktivlarini boshqarish agentligi (Davaktiv) jamoatchilikka oldindan e’lon qilinmasdan amalga oshirilgan «Paynet» to‘lov tashkilotining xususiylashtirilishi yuzasidan rasmiy izoh berdi. Agentlik direktori Sohibjon Murodovning ma’lum qilishicha, 2024 yilning aprel oyida «Uzpaynet» kompaniyasining 100 foiz ulushi qonunchilikda belgilangan mexanizmlar asosida «New Industrial Technologies» kompaniyasiga o‘tgan.

Mazkur bitim «Mas’uliyati cheklangan jamiyatlar to‘g‘risida»gi qonunda belgilangan imtiyozli sotib olish (ustuvorlik) huquqi asosida amalga oshirilgan bo‘lib, unda jamiyatning boshqa ishtirokchilari o‘z ulushini birinchi bo‘lib xarid qilish huquqidan foydalangan. Davaktiv rahbari ushbu qonuniy tartib boshqa korxonalarda ham qo‘llanishi mumkinligini qayd etib, bundan buyon xususiylashtirishning mazkur usullaridan foydalanilganda keng jamoatchilikka albatta vaqtida axborot berib borilishini ta’kidladi.

«Yotoqxonani sotish bilan umumiy yotoqxonalar soni kamayib qolmaydi» — Davaktiv Nizomiy yotoqxonasi sotilishiga izoh berdi

Davlat aktivlarini boshqarish agentligi direktori Sohibjon Murodov Nizomiy nomidagi Toshkent davlat pedagogika universiteti yotoqxonasining sotilishi bo‘yicha izoh berdi. Unga ko‘ra, mazkur bino faqatgina yangi yotoqxona qurilib, talabalar unga ko‘chirilganidan so‘nggina xususiy sektorga o‘tkaziladi. Shuningdek, shartnomada yotoqxona faoliyatini saqlab qolish talabi qat’iy belgilangan bo‘lib, bu jarayon talabalar uchun mavjud turar joylar sonining kamayishiga olib kelmaydi.

Ushbu o‘zgarishlar universitet o‘quv binolarining poytaxtdagi 7-9 ta turli hududlarda tarqoq joylashgani va bu talabalarning yo‘lga ko‘p vaqt yo‘qotib, turli qiyinchiliklarga duch kelayotgani bilan asoslandi. Ta’lim infratuzilmasini bir joyda jamlash va talabalarga qulaylik yaratish maqsadida 50 gektar yer ajratilgan bo‘lib, hozirda ushbu hududda yangi o‘quv binosi hamda talabalar turar joyi qurilishi olib borilmoqda.

Poytaxt metrosi uchun 280 mln dollarlik yangi poyezdlar xarid qilinadi

Toshkent shahar xalq deputatlari Kengashi poytaxt metropolitenining eskirgan tarkiblarini yangilash va ortib borayotgan yo‘lovchilar oqimiga xizmat ko‘rsatish sifatini oshirish maqsadida 14 ta besh vagonli (jami 70 ta vagon) elektropoyezd xarid qilish konsepsiyasini ma’qulladi. Ushbu yangi poyezdlarni kreditlar hisobidan moliyalashtirib, 2027 yilning 1-noyabrigacha uchta partiyada yetkazib berish rejalashtirilgan bo‘lib, qarz mablag‘lari davlat budjeti hisobidan qaytariladi.

Loyiha doirasida Xitoy, Rossiya, Yaponiya va boshqa qator davlatlarning ishlab chiqaruvchilari takliflari solishtirildi. Loyihaning umumiy qiymati Xitoyning «CRRC» kompaniyasi taklifiga ko‘ra eng arzon — 118,3 million dollardan, Yaponiyaning «Kawasaki» kompaniyasi variantida esa eng qimmat — 279,1 million dollargacha baholangan. Yakuniy yetkazib beruvchi hozircha aniqlanmagan bo‘lib, agar Rossiyadan boshqa ishlab chiqaruvchi tanlansa, qo‘shimcha ravishda kamida 10,13 million dollarlik yangi depo va texnik xizmat ko‘rsatish bazasini qurish talab etiladi.

Erkinjon Turdimov ta’lim va ilm-fan vaziri bo‘ldi

Bugun, 9-oktabr kuni Erkinjon Turdimov Oliy Majlis Qonunchilik palatasi deputatlari tomonidan bosh vazirning birinchi o‘rinbosari — ta’lim va ilm-fan vaziri lavozimiga tasdiqlandi. Ushbu tayinlovga qadar u Sirdaryo viloyati hokimi lavozimida ishlab kelayotgan edi. Turdimov ko‘p yillik mehnat faoliyati davomida Navoiy, Surxondaryo va Samarqand viloyatlariga ham rahbarlik qilgan.

Ma’lumot o‘rnida, yangi Ta’lim va ilm-fan vazirligi 2026 yil 3-oktabrda Maktabgacha va maktab ta’limi hamda Oliy ta’lim, fan va innovatsiyalar vazirliklari negizida tashkil etilgan edi. Mazkur vazirlik maktabgacha ta’limdan tortib oliy ta’lim va ilm-fangacha bo‘lgan barcha sohalarda, shuningdek, kasbiy ta’lim hamda kadrlar malakasini oshirish yo‘nalishlarida yagona davlat siyosatini amalga oshiradi.

KDB Bank Uzbekistan o‘z ulushi sotilishi haqidagi xabarlarga izoh berdi

Koreya taraqqiyot banki (KDB) o‘zining sho‘’ba korxonasi bo‘lgan «KDB Bank Uzbekistan»dagi ulushini sotish bo‘yicha hech qanday qaror qabul qilmaganini ma’lum qildi. Bank matbuot xizmatining rasmiy bayonotida ta’kidlanishicha, muassasa bosh kompaniyaning doimiy ko‘magi ostida o‘z faoliyatini odatdagidek davom ettirmoqda hamda O‘zbekiston moliya sektorini rivojlantirish va mijozlarga xizmat ko‘rsatish bo‘yicha strategik maqsadlariga sodiq qoladi.

Ma’lumot o‘rnida, mazkur bank 1997 yilda tashkil etilgan bo‘lib, qator o‘zgarishlar va qo‘shilishlardan so‘ng 2013 yildan beri «KDB Bank Uzbekistan» nomi ostida faoliyat yuritib kelmoqda. Hozirgi kunda bank aksiyalarining asosiy qismi, ya’ni 86,32 foizi bevosita Janubiy Koreya hukumatiga tegishli bo‘lgan Koreya taraqqiyot banki nazoratida bo‘lsa, qolgan ulushga O‘zbekistonning Milliy banki (10,31 foiz) va «Turonbank» (3,37 foiz) egalik qiladi.