Ertaga Samarqandda 18 soat davomida elektrda uzilishlar bo‘lishi mumkin
7-oktabr kuni Samarqand viloyatining barcha tumanlarida elektr ta’minotida vaqti-vaqti bilan uzilishlar kuzatilishi mumkin.
Samarqand viloyatining barcha tumanlarida 7-oktabr kuni soat 00:00 dan 18:00 gacha elektr ta’minotida vaqti-vaqti bilan uzilishlar kuzatiladi. Bu haqda «Samarqand magistral elektr tarmoqlari» filiali ma’lum qildi.
Qayd etilishicha, viloyat bo‘ylab elektr energiyasining vaqtincha o‘chib-yonishi 500/220/10 kV kuchlanishli «So‘g‘diyona» podstansiyasidagi ta’mirlash ishlari bilan bog‘liq. Ushbu podstansiyaning T-1 transformatorida rejali ta’mirlash jarayoni olib boriladi.
Ta’mirlash ishlari belgilangan vaqt oralig‘ida, ya’ni 18 soat davom etishi rejalashtirilgan.
«O‘zbekiston MET» AJ matbuot xizmati iste’molchilardan mazkur holatni to‘g‘ri tushunishlarini so‘ragan.
