O‘zbekiston va Afg‘oniston yuk tashuvchilar uchun yig‘imlarni o‘zaro kamaytiradi

O‘zbekiston va Afg‘oniston transport hamda tranzit sohasidagi hamkorlikni yanada kengaytirish, shuningdek, xalqaro avtomobil tashuvlari uchun mavjud to‘siqlarni bartaraf etish masalalarini muhokama qildi. Bu haqda O‘zbekiston Transport vazirligi ma’lum qildi.

26-iyul kuni Qobul shahrida O‘zbekiston transport vaziri Ilhom Mahkamov hamda Afg‘oniston transport va aviatsiya vaziri Muhammad Fozil Mazlum o‘rtasida muzokaralar bo‘lib o‘tdi.

Uchrashuvda ikki davlat o‘rtasida avtomobil tashuvlarini rivojlantirish, milliy tashuvchilar uchun yanada qulay sharoitlar yaratish va Afg‘oniston hududida O‘zbekiston yuk tashuvchilaridan undiriladigan yig‘imlarni qayta ko‘rib chiqish masalalari muhokama qilindi.

Yig‘imlar qisqartiriladi

Tomonlar tashuvchilardan olinadigan yig‘imlarni qisqartirish hamda ularni o‘zaro tenglik tamoyili asosida belgilash yuzasidan idoralararo ishchi guruhning navbatdagi yig‘ilishini 10-avgustga qadar o‘tkazishga kelishib oldi.

Shuningdek, yuk tashuvchilar faoliyatida uchrayotgan muammolarni tezkor hal qilish maqsadida Afg‘onistonning tegishli davlat idoralari vakillari ishtirokida alohida uchrashuv tashkil etilishi ham belgilandi.

Transport vazirligiga ko‘ra, mazkur muzokaralar ikki mamlakat o‘rtasidagi tranzit salohiyatini oshirish va xalqaro tashuvlar uchun yanada qulay muhit yaratishga xizmat qiladi.

Avval ham imtiyozlar berilgan

O‘zbekiston va Afg‘oniston transport sohasidagi yig‘imlarni kamaytirish bo‘yicha bundan avval ham kelishuvlarga erishgan.

Xususan, 2024-yil oktabr oyida Afg‘oniston hududiga kirish yig‘imi 30 foizga — 5 ming afg‘onidan 3,5 ming afg‘onigacha, «Do‘stlik» ko‘prigi orqali o‘tish uchun to‘lov esa 41,7 foizga — 12 ming afg‘onidan 7 ming afg‘onigacha qisqartirilgan edi.

Yangi muzokaralar ushbu jarayonning davomi sifatida baholanmoqda. Tomonlar yig‘imlarni yanada maqbullashtirish orqali ikki davlat o‘rtasidagi savdo va tranzit yuk tashuvlari hajmini oshirishni maqsad qilgan.