O‘zbekiston va Ummon o‘rtasida to‘g‘ridan to‘g‘ri aviareys ishga tushadi

«Oman Air» aviakompaniyasi rasman 2026 yil iyun oyidan boshlab Ummon poytaxti Masqat va O‘zbekiston poytaxti Toshkent o‘rtasida to‘g‘ridan to‘g‘ri aviaqatnovlarni yo‘lga qo‘yishini e’lon qildi.

Yangi xizmat haftada ikki marotaba amalga oshiriladi. U «Oman Air» aviakompaniya tomonidan o‘tgan dekabrdan beri ochilgan sakkizinchi xalqaro yo‘nalish hisoblanadi. Bu reys Ummon sultonligi va Markaziy Osiyo o‘rtasida havo aloqasini mustahkamlashga mo‘ljallangan bo‘lib, biznes va dam olish sayohatchilari uchun to‘rt soatlik qulay sayohatni taklif etadi.

«Oman Air» kompaniyasi bosh ijrochi direktori Kon Korfiatisning qayd etishicha, Toshkent yo‘nalishining joriy etilishi aviakompaniyaning barqaror tijorat tarmog‘ini rivojlantirishga bo‘lgan intilishini aks ettiradi. U Markaziy Osiyoning sayohat va savdo uchun tobora muhimlashib borayotgan mintaqa ekanligini ta’kidladi. Yangi xizmat Ummonning keng turizm maqsadlarini qo‘llab-quvvatlash va O‘zbekiston hamda qo‘shni mintaqadan tashrif buyuruvchilarni sultonlikning turli xil imkoniyatlarini o‘rganishga jalb qilish uchun strategik jihatdan mo‘ljallangan.

Bu tashabbus sayyohlar sonini sezilarli darajada oshirish bilan birga, ikki davlat o‘rtasidagi savdo va madaniy aloqalarni ham mustahkamlashi kutilmoqda.