Путин судланган мигрантларга Россия фуқаролигини беришни тақиқлади
Судланмагани ҳақида ҳужжат ариза юборилганидан кўпи билан уч ой олдин фуқаронинг келиб чиққан давлати томонидан берилган бўлиши лозим. Агар шахс судланган бўлса, буни тасдиқловчи ҳужжатларни ҳам тақдим этиши керак.
© 78.ruРоссия президенти Владимир Путин судланган хориж фуқаролари ва фуқаролиги бўлмаган шахсларга Россия фуқаролиги, шунингдек вақтинчалик яшаш рухсатномаси (РВП) ва доимий яшаш гувоҳномаси (ВНЖ) беришни тақиқловчи қонунни имзолади. Ҳужжат 4-август куни расмий ҳуқуқий ахборот порталида эълон қилинди.
Қонунга кўра, Россия ёки бошқа давлат ҳудудида содир этилган жиноят учун судланганлиги олиб ташланмаган ёки қонуний тартибда тугалланмаган шахсларга фуқаролик, РВП ва ВНЖ бериш рад этилади. Бунда жиноятнинг оғирлик даражаси аҳамиятга эга эмас.
Шунингдек, 14 ёшдан катта бўлган хориж фуқаролари РВП ёки ВНЖ олиш учун ариза топшираётганда Ички ишлар вазирлигининг ҳудудий органларига судланмагани ҳақида маълумотнома тақдим этиши шарт. Ушбу ҳужжат ариза берилганидан кўпи билан уч ой олдин фуқаронинг келиб чиққан давлати томонидан берилган бўлиши лозим. Агар шахс судланган бўлса, буни тасдиқловчи ҳужжатларни ҳам тақдим этиши керак.
Бу талаб 14 ёшга тўлмаган хорижликларга, қочқин мақомини олган ёки Россияда сиёсий ёки вақтинчалик бошпанага эга шахсларга, Россия Қуролли кучларида шартнома асосида хизмат қилаётган ёки улар сафида жанговар ҳаракатларда иштирок этган хорижликларга, шунингдек аввалдан бундай маълумотномани тақдим этган шахсларга татбиқ этилмайди.
Янги талаблар фуқаролиги бўлмаган шахсларга ҳам нисбатан қўлланади. Украина фуқаролари учун эса ўтиш даври белгиланган. Қонун кучга кирганидан кейинги икки йил давомида улар судланмагани ҳақидаги маълумотномани тақдим этмаслиги мумкин.
Эслатиб ўтамиз, аввалроқ Россия урушга сафарбар қилганларнинг учдан икки қисми ҳалок бўлганди. Шунингдек, Путин Ўзбекистон ва Қозоғистон билан ҳарбий келишувларни қайта кўриб чиқмоқчилиги хабар қилинганди.
